ന്യൂഡല്‍ഹി: ബാങ്കില്‍ നിന്ന് പണം പിന്‍വലിക്കുന്നതില്‍ ഏര്‍പ്പെടുത്തിയ നിയന്ത്രണത്തില്‍ ചെറിയ ഇളവുകള്‍ വരുത്തി. ഒരു ദിവസം പരമാവധി 10,000 രൂപ മാത്രമേ പിന്‍വലിക്കാവൂ എന്ന നിബന്ധന എടുത്തുകളഞ്ഞു.

എന്നാല്‍ ഒരാഴ്ച പരമാവധി 24,000 രൂപ മാത്രമേ പിന്‍വലിക്കാനാവൂ. നേരത്തെ ഇത് 20,000 രൂപയായിരുന്നു. എ.ടി.എമ്മില്‍ നിന്ന് പിന്‍വലിക്കാവുന്ന തുകയും ഉയര്‍ത്തിയിട്ടുണ്ട്. 2500 രൂപ പിന്‍വലിക്കാനാവും. നേരത്തെ ഇത് 2000 രൂപയായിരുന്നു. മാറ്റി വാങ്ങാന്‍ പറ്റുന്നതിന്റെ പരിധിയും 4000 രൂപയില്‍ നിന്ന് 4500 രൂപയാക്കി ഉയര്‍ത്തിയിട്ടുണ്ട്.

ഇന്ന് ധനമന്ത്രാലയത്തിന്റെ നേതൃത്വത്തില്‍ ചേര്‍ന്ന ഉന്നതതല യോഗത്തിലാണ് തീരുമാനമായത്.

പുതിയ നിര്‍ദേശങ്ങള്‍ വന്നതോടെ ഒറ്റയടിക്ക് തന്നെ 24,000 രൂപ വരെ പിന്‍വലിക്കാം. ഭിന്നശേഷിയുള്ളവര്‍ക്കും മുതിര്‍ന്ന പൗരന്മാര്‍ക്കും സൗകര്യത്തിനു വേണ്ടി പ്രത്യേക ക്യൂവും ഏര്‍പ്പെടുത്താന്‍ നിര്‍ദേശം നല്‍കിയിട്ടുണ്ട്.

500 രൂപയുടെ പുതിയ നോട്ടുകള്‍ പുറത്തിറക്കിയതിനു പിന്നാലെയാണ് പിന്‍വലിക്കുന്ന കാര്യത്തില്‍ ഇളവ് നല്‍കിയത്.