ന്യൂഡല്‍ഹി: ഐ.എസ്.എല്ലില്‍ ഒന്നാം സ്ഥാനക്കാരായ ഡല്‍ഹി ഡൈനാമോസിനെ അത്‌ലറ്റിക്കോ ഡി കൊല്‍ക്കത്ത 2-2ന് സമനിലയില്‍ തളച്ചു. ആദ്യ പകുതിയില്‍ ഒരു ഗോളിന് മുന്നിട്ടു നിന്ന ശേഷമാണ് അത്‌ലറ്റിക്കോ ജയം കൈവിട്ടത്. ആദ്യ പകുതി അവസാനിക്കാന്‍ ഒരു മിനുട്ട് ശേഷിക്കെ ബദാര ബാദ്ജിക്ക് ചുവപ്പു കാര്‍ഡ് കണ്ട് പത്തു പേരായി ചുരുങ്ങിയിട്ടും മത്സരത്തില്‍ മികച്ച  രീതിയില്‍ പൊരുതാന്‍ ഡല്‍ഹി സാധിച്ചു.

ഡല്‍ഹിയുടെ തട്ടകത്തില്‍ ജയത്തില്‍ കുറഞ്ഞൊന്നും ചിന്തിക്കാതെയാണ് അത്‌ലറ്റിക്കോ ഇറങ്ങിയത്. ഇരുടീമുകളും മികച്ചു നിന്നെങ്കിലും ഫൗളുകളാണ് സമ്പുഷ്ടമായിരുന്നു മത്സരം. ഒരു ചുവപ്പു കാര്‍ഡും ആറു മഞ്ഞക്കാര്‍ഡുമാണ് റഫറി പുറത്തെടുത്തത്. എന്നാല്‍ അത്‌ലറ്റിക്കോ മികച്ച മുന്നേറ്റം നടത്തി. നിരന്തരം നീക്കങ്ങള്‍ നടത്തിയ ടീം ആദ്യ ഗോള്‍ നേടുകയും ചെയ്തു. സമീഹ് ദൗത്തി നല്‍കിയ പാസുമായി മുന്നേറിയ ഹ്യൂം ഡോബ്ലസിനെ മറികടന്ന് ഗോള്‍ നേടുകയായിരുന്നു. ഗോളിന ്‌ശേഷം ഇരുടീമുകളും കൂടുതല്‍ ഫൗളുകള്‍ക്കാണ് മുതിര്‍ന്നത്.

അതേസമയം ഡല്‍ഹി താളം കണ്ടെത്താന്‍ വിഷമിക്കുന്നതാണ് കണ്ടത്.
ഇതിനിടെ പന്ത് കൈകൊണ്ട്  തൊട്ടതിന് ബാദ്ജിക്ക് രണ്ടാം മഞ്ഞക്കാര്‍ഡ് ലഭിച്ചത് ഡല്‍ഹി വീണ്ടും തിരിച്ചടിയായി. രണ്ടാം പകുതിയില്‍ ഗോളിനായി ഡല്‍ഹി ശ്രമങ്ങള്‍ നടത്തി കൊണ്ടേയിരുന്നു.
63ാം മിനുട്ടില്‍ ടീം ലക്ഷ്യം കാണുകയും ചെയ്തു. മിലാന്‍ സിങാണ് ഡൈനാമോസിന് സമനില സമ്മാനിച്ചത്. 71ാം മിനുട്ടില്‍ ജാവി ലാറ അത്‌ലറ്റിക്കോയുടെ രണ്ടാം ഗോള്‍ നേടിയതോടെ ടീം ജയിക്കുമെന്ന് കരുതി. പക്ഷേ ഫ്‌ളോറന്റ് മലൂദ നേടിയ ഗോളില്‍ സമനിലയുമായി രക്ഷപ്പെടുകയായിരുന്നു ഡല്‍ഹി.