കൊച്ചി: നോട്ട് നിരോധനം ആറാം ദിവസം പിന്നിടുമ്പോള്‍ ജില്ലയില്‍ ചില്ലറയ്ക്കായി ജനങ്ങള്‍ നൊട്ടോട്ടമോടുന്നു. ബാങ്കുകളില്‍ നിന്നു ലഭിക്കുന്ന 2000 രൂപയുടെ നോട്ട് മാറി ചില്ലറയാക്കാനുള്ള ഓട്ടത്തിലാണു സാധാരണക്കാര്‍. ഇതോടൊപ്പം പഴയ നോട്ട് മാറി വാങ്ങാനെത്തുന്നവരുടെ എണ്ണത്തിലും കുറവില്ല. നോട്ടുമാറുന്നതിന് ജനം കൂട്ടത്തോടെ എത്തിതുടങ്ങിയപ്പോള്‍ ജില്ലയിലെ പല ബാങ്കുകളുടെയും പ്രവര്‍ത്തനം ഇന്നലെ സ്തംഭിച്ചു. കറന്‍സി ക്ഷാമമാവും ബാങ്കുകള്‍ വരും ദിവസങ്ങളില്‍ നേരിടുക.
500,1000 എന്നീ കറന്‍സികള്‍ അസാദുവാക്കിയ ദിവസത്തില്‍ എത്തിച്ചിട്ടുള്ള 2000 ന്റെ പുതിയ കറന്‍സികള്‍ മാത്രമാണ് ബാങ്കുകളിലും, റിസര്‍വ് ബാങ്ക് ശാഖകളിലും നിലവിലുള്ളത്. എന്നാല്‍ ചില്ലറക്ഷാമത്തെ തുടര്‍ന്നു രണ്ടായിരത്തി നോട്ടുകള്‍ക്കു പകരം 100, 10, 50, 20 രൂപകളുടെ നോട്ടുകള്‍ക്കാണ് ആവശ്യക്കാരേറെ. ഇതോടെ ബാങ്കുകളിലുണ്ടായിരുന്ന നോട്ടുകളുടെ അളവും കുറഞ്ഞിരിക്കുകയാണ്. നിരോധനമില്ലാത്ത 100, 50 രൂപാനോട്ടുകള്‍പോലും ആവശ്യത്തിനു കരുതാതിരുന്നതാണു പ്രതിസന്ധി സൃഷ്ടിച്ചത്.
എ.ടി.എമ്മുകളില്‍ നോട്ട് കുറഞ്ഞതോടെ ക്ലീന്‍ നോട്ട് പോളിസിപ്രകാരം വിപണിയില്‍ നിന്നു പിന്‍വലിച്ച മുഷിഞ്ഞതും കേട് വന്നതുമായ നോട്ടുകള്‍ വീണ്ടും എ.ടി.എമ്മുകള്‍ വഴി വിതരണം നടത്താനുള്ള ശ്രമങ്ങളും നടക്കുന്നുണ്ട്. ചില്ലറ ക്ഷാമം രൂക്ഷമായതോടെ ബാങ്കുകള്‍ ശേഖരിച്ച പഴകിയ നോട്ടുകളാണ് എ.ടി.എം വഴി നല്‍കികൊണ്ടിരിക്കുന്നത്. നൂറിന്റെ നോട്ടുകള്‍ മാത്രമാണു നിലവില്‍ എ.ടി.എം വഴി ലഭ്യമാവുന്നത്. കഴിഞ്ഞ ദിവസം ബാങ്കുകളില്‍ നിന്ന് വിതരണം ചെയ്തവയില്‍ ഏറെയും പഴകിയ കറന്‍സികളായിരുന്നെന്ന് ജീവനക്കാര്‍ പറയുന്നത്. എ.ടി.എമ്മുകളില്‍ പ്രതിദിനം നാല് ലക്ഷം രൂപവരെയാണ് ശേഖരിക്കാന്‍ കഴിയുക. പകുതി തുക പോലും എ.ടി.എമ്മുകളില്‍ നിറക്കാന്‍ സാധിക്കാത്തതു പ്രതിസന്ധി രൂക്ഷമാക്കുന്നു.