പുനഃപരിശോധിക്കണം: കെ.പി രാജേന്ദ്രന്‍
കൊച്ചി: നോട്ടുകള്‍ അസാധുവാക്കിയതിനു പകരം നോട്ടുകള്‍ ഇറക്കാന്‍ കഴിയാത്ത സാഹചര്യത്തില്‍ തീരുമാനം പുനഃപരിശോധിച്ച് പ്രധാനമന്ത്രി ജനങ്ങളോട് മാപ്പ് പറയണമെന്ന് എ.ഐ.ടി.യു.സി സംസ്ഥാന ജനറല്‍ സെക്രട്ടറി കെ.പി രാജേന്ദ്രന്‍. 500ന്റെയും 1000ത്തിന്റെയും നോട്ടുകള്‍ പിന്‍വലിച്ചതിനു പകരമായി ഇറക്കിയ 2000ത്തിന്റെ നോട്ടുകള്‍ ഉപയോഗിക്കാനാകാതെ ജനങ്ങള്‍ വലയുകയാണ്. ഈ സാഹചര്യത്തില്‍ ആവശ്യത്തിനു ചില്ലറനോട്ടുകള്‍ ലഭ്യമാകുന്നതുവരെ പഴയ നോട്ടുകള്‍ ഉപയോഗിക്കുന്നതുള്ള അനുമതി നല്‍കാന്‍ കേന്ദ്രസര്‍ക്കാര്‍ തയ്യാറാകണമെന്നും അദ്ദേഹം പറഞ്ഞു. നോട്ടുകള്‍ അസാധുവാക്കി ജനങ്ങളെ ദുരിതത്തിലായതില്‍ പ്രതിഷേധിച്ച് സി.പി.ഐ എറണാകുളം ജില്ലാകൗണ്‍സിലിന്റെ നേത്യത്വത്തില്‍ എറണാകുളം റിസര്‍വ് ബാങ്ക് ഓഫീസിലേക്ക് പ്രതിഷേധ മാര്‍ച്ച് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
വിദേശരാജ്യങ്ങളിലുള്ള കള്ളപ്പണവും നിക്ഷേപവും കണ്ടെത്തുവാനും നിഷ്‌ക്രിയ ആസ്തികള്‍ തിരിച്ചുപിടിക്കുവാനും സര്‍ക്കാര്‍ തയ്യാറാകണം. സഹകരണ പ്രസ്ഥാനങ്ങള്‍ കള്ളപ്പണത്തിന്റെ കേന്ദ്രങ്ങളാണെന്ന് പ്രചരിപ്പിച്ച് കേരളത്തിലെ സഹകരണ പ്രസ്ഥാനങ്ങളെ ഇല്ലായ്മ ചെയ്യുവാനുള്ള നീക്കങ്ങളാണ് ബിജെപി നേതൃത്വം നടത്തുന്നതെന്ന് അദ്ദേഹം പറഞ്ഞു.
ധൃതിപിടിച്ചുള്ള കേന്ദ്രസര്‍ക്കാറിന്റെ ഈ തീരുമാനം കുത്തകകളെ സഹായിക്കുന്നതും സാധാരണക്കാരെ ദ്രോഹിക്കുന്നതുമാണന്നും രാജേന്ദ്രന്‍ പറഞ്ഞു. സി.പി.ഐ ജില്ലാസെക്രട്ടറി പി രാജു അധ്യക്ഷത വഹിച്ചു. ദേശീയ കൗണ്‍സിലംഗം കമലാസദാനന്ദന്‍, സംസ്ഥാന കമ്മിറ്റിയംഗങ്ങളായ കെ.എം ദിനകരന്‍, കെ.എന്‍ സുഗതന്‍, ഇ.കെ ശിവന്‍, കെ.കെ അഷറഫ് തുടങ്ങിയവര്‍ സംസാരിച്ചു. സി.പി.ഐ എറണാകുളം ജില്ലാകമ്മിറ്റി ഓഫീസില്‍ നിന്നും ആരംഭിച്ച മാര്‍ച്ചിന് ബാബുപോള്‍, എം.ടി നിക്‌സണ്‍, ടി.സി സന്‍ജിത്ത്, സി.വി ശശി, എസ് ശ്രീകുമാരി, അഡ്വ. മനോജ് ജി കൃഷ്ണന്‍, എം.പി രാധാകൃഷ്ണന്‍ തുടങ്ങിയവര്‍ നേതൃത്വം നല്‍കി.