ന്യൂഡല്‍ഹി: ഇന്ത്യാ- പാക് അതിര്‍ത്തിക്കടുത്ത് പാക് സൈനിക അഭ്യാസ പ്രകടനം. പ്രകടനം വീക്ഷിക്കാന്‍ പാക് പ്രധാന മന്ത്രി നവാസ് ശരീഫും. പാകിസ്താനോട് ചേര്‍ന്ന ജമ്മു കശ്മിര്‍- പഞ്ചാബ് അതിര്‍ത്തിയിലാണു സൈനിക അഭ്യാസം നടക്കുന്നത്. പാക്ക്, പഞ്ചാബ് പ്രവിശ്യയിലെ ഖെയ്ര്‍പുര്‍ തമിവാലിയിലാണെന്നു റിപ്പോര്‍ട്ടുകള്‍ സൂചിപ്പിക്കുന്നു. സൈനിക അഭ്യാസം നിരീക്ഷിക്കുന്നതിനായി പാക് പ്രധാനമന്ത്രി നവാസ് ശരീഫിനു പുറമേ സൈനിക മേധാവി ജനറല്‍ റഹീല്‍ ശരിഫും സന്നിഹിതനായിരുന്നു.
റാദുല്‍ ബര്‍ഖ് എന്ന പേരിലാണു സൈനിക അഭ്യാസം. ടാങ്കുകള്‍, വിമാനങ്ങള്‍, പീരങ്കികള്‍, മറ്റ് അത്യാധുനിക ആയുധങ്ങള്‍ എന്നിവ അഭ്യാസത്തില്‍ പ്രദര്‍ശിപ്പിക്കുന്നുണ്ട്. സൈന്യത്തിന്റെ ശക്തി പരീക്ഷിക്കുന്നതിനുവേണ്ടിയാണ് ഇതെന്നു പറയുന്നുണ്ടെങ്കിലും ഇന്ത്യയ്ക്കു മുന്നറിയിപ്പായാണു സൈനിക അഭ്യാസം എന്നു കരുതപ്പെടുന്നു. കഴിഞ്ഞദിവസം ഇന്ത്യന്‍ സൈന്യത്തിന്റെ വെടിവയ്പില്‍ ഏഴു പാക് സൈനികര്‍ കൊല്ലപ്പെട്ടിരുന്നു. ഇതിനു തൊട്ടുപിന്നാലെയാണ് ഇന്ത്യന്‍ അതിര്‍ത്തിയില്‍ പാകിസ്താന്‍ സൈനിക അഭ്യാസം സംഘടിപ്പിക്കുന്നത്.
ശത്രുക്കള്‍ക്കെതിരേ ഏതു നിലയ്ക്കുള്ള നീക്കത്തിനും സൈന്യം തയാറാണെന്നു തെളിയിക്കുന്നതാണ് അഭ്യാസ പ്രകടനമെന്നു നവാസ് ശരീഫ് പറഞ്ഞു.