നെയ്യാറ്റിന്‍കര: തിരുവനന്തപുരം റവന്യൂ ജില്ലാ ശാസ്‌ത്രോത്സവത്തിന് നെയ്യാറ്റിന്‍കരയില്‍ ഇന്ന് തുടക്കമാകും. ഒരുക്കങ്ങള്‍ പൂര്‍ത്തിയായതായി സംഘാടകര്‍ അറിയിച്ചു. നെയ്യാറ്റിന്‍കര ഗവ.ബോയ്‌സ് എച്ച്.എസ്.എസ്, ഗവ.ഗേള്‍സ് എച്ച്.എസ്.എസ്, ജെ.ബി.എസ് , ടൗണ്‍ എല്‍.പി.എസ് എന്നിവിടങ്ങളിലായാണ് മൂന്നു ദിവസത്തെ ശാസ്ത്ര-ഗണിതശാസ്ത്ര , സാമൂഹ്യശാസ്ത്ര പ്രവൃത്തി പരിചയ ഐ.ടി മേള നടക്കുന്നത്.
ഉദ്ഘാടന ദിവസമായ ഇന്ന് രാവിലെ ശാസ്ത്രമേള , സാമൂഹ്യ ശാസ്ത്രമേള (വര്‍ക്കിങ് മോഡല്‍ , സ്റ്റില്‍ മോഡല്‍ , ടീച്ചിങ് എയ്ഡ് , പ്രാദേശിക ചിത്ര രചന , പ്രാദേശിക രചന ഇന്റര്‍വ്യൂ) ഐ.ടി മേള എന്നിവ നടക്കും.നാളെ പ്രവൃത്തി പരിചയ തത്സമയ നിര്‍മാണ മത്സരം , സാമൂഹ്യശാസ്ത്ര ക്വിസ് മത്സരങ്ങള്‍ , ഐ.ടി മേള എന്നിവ നടക്കും. മറ്റെന്നാള്‍ ഗണിതശാസ്ത്ര തത്സമയ മത്സരങ്ങള്‍ , സാമൂഹ്യശാസ്ത്ര എച്ച്.എസ് , എച്ച്.എസ്.എസ് അറ്റ്‌ലസ് നിര്‍മാണം , യു.പി , എച്ച്.എസ് , എച്ച്.എസ്.എസ് പ്രസംഗ മത്സരം , ഐ.ടി മേള എന്നിവ നടക്കും.
ജില്ലയിലെ 12 സബ് ജില്ലകളില്‍ നിന്നുളള ആറായിരത്തില്‍പ്പരം വിദ്യാര്‍ഥികള്‍ മേളയില്‍ മാറ്റുരയ്ക്കും. ഇന്ന് രാവിലെ 10.00 ന് നെയ്യാറ്റിന്‍കര ഗവ.എച്ച്.എസ്.എസില്‍ ചേരുന്ന സമ്മേളനത്തില്‍ കെ.ആന്‍സലന്‍ എം.എല്‍.എ ഉദ്ഘാടനം നിര്‍വഹിക്കും.