ഛണ്ഡിഗഡ്: ഹരിയാനയിലെ കര്‍നാലില്‍ വിവാഹാഘോഷത്തിനിടെ ആള്‍ദൈവത്തിന്റെ വെടിയേറ്റു വരന്റെ അമ്മായി മരിച്ചു. മറ്റു മൂന്നു പേര്‍ക്കു പരുക്ക്. വിവാഹത്തിന് അതിഥിയായി എത്തിയ സ്വയം പ്രഖ്യാപിത ആള്‍ദൈവമായ സ്വാതി ദേവ താക്കൂറും അനുയായികളുമാണു വെടിയുതിര്‍ത്ത് വിവാഹാഘോഷം നടത്തിയത്. വെടികൊണ്ട സ്ത്രീ വീണയുടന്‍ മരിച്ചു. മറ്റ് മൂന്നു ബന്ധുക്കള്‍ക്കു ഗുരുതരമായി പരുക്കേറ്റു.
വിവാഹവുമായി ബന്ധപ്പെട്ട് ഒരുക്കിയിരുന്ന നൃത്തം നടക്കുന്ന സമയം നിറയെ ആളുകളുണ്ടായിരുന്നു. ഗായഗ സംഘത്തോട് സ്വാതി തന്റെ പാട്ട് പാടാന്‍ ആവശ്യപ്പെടുകയായിരുന്നു. പാട്ട് തുടങ്ങുകയും ആളുകള്‍ക്കൊപ്പം ഇവര്‍ ഡാന്‍സ് തുടങ്ങുകയും ചെയ്തു. പിന്നീടു തോക്ക് വലിച്ചെടുത്തു വെടി തുടങ്ങി. ഇതോടെ അനുയായികളും വെടിവയ്പ്പു തുടങ്ങി. ആളുകള്‍ തിങ്ങി നിറഞ്ഞ സ്റ്റേജിനു നേരെയാണു വെടിയുണ്ടകള്‍ പാഞ്ഞത്. വെടിയേറ്റ് ഒരാള്‍ വീണതറിഞ്ഞതോടെ സ്വാതിയും സംഘവും ഓടി രക്ഷപ്പെട്ടു.
കൊലപാതകത്തിനും ആയുധം കൈവശം വച്ചതിനും കേസെടുത്തിട്ടുണ്ട്. സ്വാതി വെടിവയ്ക്കുന്ന ദൃശ്യങ്ങള്‍ സാമൂഹ്യമാധ്യമങ്ങളില്‍ വൈറലായിട്ടുണ്ട്.