കാക്കനാട്:  സ്വകാര്യ ബസും പിക്കപ്പ് വാനും കൂട്ടിയിടിച്ച് രണ്ട് പേര്‍ക്ക് പരുക്കേറ്റു. കാക്കനാട് സിവില്‍ ലൈന്‍ റോഡില്‍ യൂത്ത് ഹോസ്റ്റലിനു സമീപം ഇന്നലെ  വൈകിട്ട് അഞ്ചിനാണ് അപകടം. പരുക്കേറ്റവരില്‍ ഒരാളുടെ നില ഗുരുതരമാണ്. എറണാകുളം ഭാഗത്ത് നിന്നും മൂവാറ്റുപുഴയിലേക്ക് പോകുന്ന  ത്രീ കിംഗ്‌സ് ബസും, എന്‍ജിഒ കോര്‍ട്ടേഴ്‌സ് ഭാഗത്തു നിന്നും കോഴിമുട്ട കയറ്റി വരുന്ന പിക്കപ്പ് വാനും തമ്മില്‍ കൂട്ടിയിടിക്കുകയായിരുന്നു.
വാനിന്റെ മുന്‍വശം പൂര്‍ണമായും തകര്‍ന്ന നിലയിലാണ്. അലുവ തായിക്കാട്ടുകര സ്വദേശികളായ സുധീബ് ഗോപി (20), റഫീഖ് (19) എന്നിവര്‍ക്കാണ് പരുക്കേറ്റത്. ഇതില്‍ പിക്കപ്പ് വാഹനം ഓടിച്ച സുധീബ് ഗോപിയുടെ തുടയെല്ലിനാണ്  ഗുരുതര പരുക്കേറ്റത്. ഇടപ്പള്ളി ട്രാഫിക്ക് പൊലീസ് മേല്‍നടപടികള്‍ സ്വീകരിച്ചു.