മഞ്ചേരി: പ്രകൃതി ചൂഷണത്തിനെത്തിനെതിരെ കരവിരുതു തീര്‍ത്ത് മലപ്പുറം കോട്ടപ്പടി ഗവ. ഗേള്‍സ് ഹയര്‍ സെക്കന്‍ഡറി സ്‌കൂളിലെ സ്വാലിഹാ തസ്‌നി ക്ലേ മോഡലിങ്ങില്‍ എ ഗ്രെയ്‌ഡോടെ ഒന്നാം സ്ഥാനക്കാരിയായി. ഹയര്‍സെക്കന്‍ഡറി വിഭാഗത്തിലെ ക്ലേ മോഡലിങിനു 'വിശ്രമം' എന്നതായിരുന്നു വിഷയം. മുറിച്ചുമാറ്റിയ മൂന്നു മരങ്ങളും, അതില്‍ ശിഖിരങ്ങള്‍ മാറ്റിയ മരത്തില്‍ ചാരി വിശ്രമിക്കുന്ന മരം വെട്ടുകാരനേയുമാണ് സ്വാലിഹ കരവിരുതില്‍ തീര്‍ത്തത്. വെട്ടിയിട്ട ഇല കൊണ്ട് വീശി കാറ്റുകൊള്ളുന്ന 'വിശ്രമം' പറയുന്ന സാമൂഹ്യ വിമര്‍ശനം ക്ലേ മോഡലിങ് മത്സരത്തില്‍ വേറിട്ട കാഴ്ചയായി. ഒന്നാം വര്‍ഷ ഹയര്‍സെക്കന്‍ഡറി കൊമേഴ്‌സ് വിദ്യാര്‍ഥിയായ സ്വാലിഹാ തസ്‌നി കഴിഞ്ഞ വര്‍ഷം ഹൈസ്‌കൂള്‍ ജില്ലാതലത്തിലെ ഒന്നാം സ്ഥാനക്കാരിയും സംസ്ഥാന മല്‍സരത്തില്‍ ബി.ഗ്രേഡ് ജേതാവുമാണ്. മലപ്പുറ പറയങ്ങാടി ചെറുകാട്ടില്‍ മൊയ്തീന്റേയും സനാജയുടേയും മകളാണ്. 34 പേരാണ് ഹയര്‍സെക്കന്‍ഡറി ക്ലേ മോഡലിങിനു മത്സര രംഗത്തുണ്ടായിരുന്നത്.