പൂനെ: ആവേശം വാനോളം ചൊരിഞ്ഞ ഐ.എസ്.എല്‍ പോരാട്ടത്തില്‍ ഡല്‍ഹിയെ കീഴ്‌പ്പെടുത്തി പൂനെ. മൂന്നിനെതിരെ നാലു ഗോളുകള്‍ നേടിയാണ് പൂനെയുടെ വിജയം.

ഹോം ഗ്രൗണ്ടിലെ അവസാന പോരാട്ടത്തിന്റെ ആദ്യ പകുതിയില്‍ ഒരു ഗോള്‍ നേടി ഡല്‍ഹി മുന്നിലായിരുന്നു. എന്നാല്‍ രണ്ടാം പകുതിയില്‍ അടിക്ക് തിരിച്ചടിയെന്നോണം പിറന്നത് ആറു ഗോളുകള്‍. അനിബാള്‍ റോഡ്രിഗസിന്റെ ഇരട്ട ഗോളുകളാണ് പൂനെയ്ക്കു ഗംഭീര വിജയമൊരുക്കിയത്. എട്ടു മിനുട്ടിനിടെ മൂന്നു ഗോളുകള്‍ വലയിലെത്തിച്ച് പൂനെ ഡല്‍ഹിയെ അക്ഷരാര്‍ഥത്തില്‍ ഞെട്ടിക്കുകയായിരുന്നു.

44ാം മിനുട്ടില്‍ കീന്‍ ലൂയിസിലൂടെ ഡല്‍ഹി ലീഡെടുത്തു. എന്നാല്‍ വര്‍ധിത വീര്യത്തോടെ പൂനെ കളിയില്‍ തിരിച്ചെത്തുന്നതായിരുന്നു രണ്ടാം പകുതിയിലെ കാഴ്ച.

55-ാം മിനിറ്റില്‍ ജൊനാഥന്‍ ലൂക്കയുടെ ഫ്രീ കിക്കില്‍ നിന്ന് അനിബാള്‍ റോഡ്രിഗസ് ഹെഡ്ഡറിലൂടെ വല ചലിപ്പിച്ചു. സമനിലയുടെ വീര്യത്തില്‍ തുടരെ തുടരെ രണ്ടു ഗോളുകള്‍ കൂടി പൂനെ ഡല്‍ഹി വലയില്‍ നിക്ഷേപിച്ചു. 62-ാം മിനുട്ടില്‍ സിസ്സോക്കോയും 63-ാം മിനുട്ടില്‍ അനിബാള്‍ റോഡ്രിഗസ് തന്റെ തന്റെ രണ്ടാം ഗോളിലൂടെയും വല ചലിപ്പിച്ചു.

3-1നു പിന്നിലായിട്ടും ഡല്‍ഹിയും വിടാനുള്ള മട്ടില്ലായിരുന്നു. ഡല്‍ഹിയും കടുത്ത ആക്രമണം അഴിച്ചുവിട്ടു. 79ാം മിനുട്ടില്‍ ഫ്‌ളോറന്റ് മലൂദ തൊടുത്ത ക്ലോസ് റേഞ്ച് ഷോട്ട് തടുക്കാനുള്ള പൂനെ പ്രതിരോധ താരം എഡ്വാര്‍ഡോ ഫെരെയ്‌രയുടെ ശ്രമം പിഴച്ചു. താരത്തിന്റെ സെല്‍ഫ് ഗോളില്‍ ഡല്‍ഹി രണ്ടാം ഗോള്‍ നേടി. 90 മിനുട്ടു കഴിഞ്ഞ് അഞ്ചു മിനുട്ട് ഇഞ്ച്വറി ടൈം. ഇഞ്ച്വറി ടൈമിന്റെ മൂന്നാം മിനുട്ടില്‍ പൂനെ ലെനി റോഡ്രിഗസിലൂടെ നാലാം ഗോളും ലക്ഷ്യത്തിലെത്തിച്ചു.

പരാജയപ്പെട്ടെങ്കിലും 17 പോയിന്റുമായി ഡല്‍ഹി തന്നെ പോയിന്റ് പട്ടികയില്‍ മുന്നില്‍. 11 മത്സരങ്ങളില്‍ നിന്നു 15 പോയിന്റുമായി പൂനെ നാലാം സ്ഥാനത്തേക്കുയര്‍ന്നു. അത്‌ലറ്റിക്കോ ഡി കൊല്‍ക്കത്ത അഞ്ചാം സ്ഥാനത്തേക്കിറങ്ങി.