ഫോസു (ചൈന): ഇന്ത്യയുടെ പി.വി സിന്ധു ചൈന ഓപണ്‍ സൂപ്പര്‍ സീരീസ് ബാഡ്മിന്റണിന്റെ ഫൈനലിലെത്തി. സെമിയില്‍ ദക്ഷിണ കൊറിയന്‍ താരമായ സുങ് ജി ഹ്യൂനിനെ മൂന്നു സെറ്റു നീണ്ട പോരാട്ടത്തില്‍ കീഴടക്കുകയായിരുന്നു. സ്‌കോര്‍: 11-21, 23-21, 21-19.
ഒരു മണിക്കൂറും 24മിനുട്ടും നീണ്ട കടുത്ത പോരാട്ടത്തിലാണ് സിന്ധുവിന്റെ വിജയം. ആദ്യ സെറ്റ് കൈവിട്ട ഇന്ത്യന്‍ താരം രണ്ടും മൂന്നും സെറ്റുകള്‍ നേടി ഉജ്ജ്വല തിരിച്ചു വരവാണ് നടത്തിയത്. നേരത്തെ ആതിഥേയ താരമായ ഹി ബിങ്ജിയാവോയെ കീഴടക്കിയാണ് സിന്ധു സെമിയിലെത്തിയത്.
ഏഴാം സീഡായ സിന്ധു ഇന്നു നടക്കുന്ന ഫൈനലില്‍ ചൈനീസ് താരവും എട്ടാം സീഡുമായ സന്‍ യുവുമായി ഏറ്റുമുട്ടും. കരിയറിലെ ആദ്യ സൂപ്പര്‍ സീരീസ് കിരീടം തേടിയാണ് ചൈനീസ് താരം പോരിനിറങ്ങുന്നത്.
ഒളിംപിക്‌സില്‍ വെള്ളി മെഡല്‍ നേടിയ ശേഷം സിന്ധു മത്സരിക്കുന്ന മൂന്നാമത്തെ സൂപ്പര്‍ സീരീസ് പോരാട്ടമാണിത്. നേരത്തെ ഡെന്‍മാര്‍ക്, ഫ്രഞ്ച് ഒപണുകളില്‍ മത്സരിച്ച ഇന്ത്യന്‍ താരത്തിനു തുടക്കത്തില്‍ തന്നെ പുറത്താകാനായിരുന്നു യോഗം.