കണ്ണൂര്‍: തെരഞ്ഞെടുപ്പിന്റെ ഓരോ ഘട്ടങ്ങളിലും യു.ഡി.എഫ് പ്രതീക്ഷിച്ചതു പോലെ തന്നെ അഴീക്കോട് സംഭവിച്ചുവെന്ന് മുസ്‌ലിം ലീഗ് ജില്ലാ പ്രസിഡന്റ് പി കുഞ്ഞിമുഹമ്മദും ജനറല്‍ സെക്രട്ടറി അബ്ദുല്‍കരീം ചേലേരിയും പ്രസ്താവിച്ചു. കഴിഞ്ഞ അഞ്ചു വര്‍ഷത്തിനിടയില്‍ അഴീക്കോട് മണ്ഡലത്തിന്റെ മുഖച്ഛായ മാറ്റിയ വികസന പ്രവര്‍ത്തനങ്ങളും കാരുണ്യരംഗത്തെ മുന്നേറ്റവും യു.ഡി.എഫിനെ തുണച്ചപ്പോള്‍ എസ്.ഡി.പി.ഐയും വെല്‍ഫെയര്‍ പാര്‍ട്ടിയും എല്‍.ഡി.എഫിന് വോട്ട് ചെയ്തിട്ടും അവര്‍ക്ക് വിജയിക്കാനായില്ല. കഴിഞ്ഞ അസംബ്ലി തെരഞ്ഞെടുപ്പില്‍ ബി.ജെ.പി നേടിയ 7540 വോട്ട് 12580 വോട്ടാക്കി വര്‍ധിപ്പിച്ചിട്ടും കോണ്‍ഗ്രസില്‍ നിന്നു പുറത്താക്കിയ പി.കെ രാഗേഷ് 1518 വോട്ട് പിടിച്ചിട്ടും അഴീക്കോട് യു.ഡി.എഫിന്റെ മുന്നേറ്റത്തെ തടഞ്ഞു നിര്‍ത്താനായില്ലെന്ന് അവര്‍ പറഞ്ഞു. കെ.എം ഷാജിയെയും മറ്റു യു.ഡി.എഫ് സ്ഥാനാര്‍ഥികളെയും വിജയിപ്പിച്ച എല്ലാ വോട്ടര്‍മാര്‍ക്കും നേതാക്കള്‍ നന്ദി പ്രകാശിപ്പിച്ചു.