ക്രൈസ്റ്റ്ചര്‍ച്ച്: അരങ്ങേറ്റക്കാരുടെ മികവില്‍ പാകിസ്താനെതിരായ ആദ്യ ക്രിക്കറ്റ് ടെസ്റ്റില്‍ ന്യൂസിലന്‍ഡിനു എട്ടു വിക്കറ്റ് വിജയം. 105 റണ്‍സ് വിജയ ലക്ഷ്യത്തിലേക്ക് ബാറ്റു വീശിയ കിവികള്‍ രണ്ടു വിക്കറ്റ് നഷ്ടത്തില്‍ 108 റണ്‍സെടുത്തു. 61 റണ്‍സെടുത്ത് നായകന്‍ കെയ്ന്‍ വില്ല്യംസന്‍ മികച്ച ബാറ്റിങ് പുറത്തെടുത്തു. ജീറ്റ് റാവല്‍ 36 റണ്‍സെടുത്തു പുറത്താകാതെ നിന്നു. ആദ്യ ഇന്നിങ്‌സില്‍ ആറു വിക്കറ്റുകളും രണ്ടാമിന്നിങ്‌സില്‍ ഒരു വിക്കറ്റും വീഴ്ത്തി ഗ്രാന്‍ഡ്‌ഹോമും രണ്ടിന്നിങ്‌സിലുമായി യഥാക്രമം 55ഉം 36ഉം റണ്‍സെടുത്ത്  ജീറ്റ് റാവലും അരങ്ങേറ്റം അവിസ്മരണീയമാക്കി. ഗ്രാന്‍ഡ്‌ഹോമാണ് കളിയിലെ കേമന്‍.
ആദ്യ ഇന്നിങ്‌സില്‍ പാകിസ്താന്‍ 133 റണ്‍സും ന്യൂസിലന്‍ഡ് 200 റണ്‍സെടുത്തു പുറത്തായി. ഏഴിനു 129 എന്ന നിലയില്‍ നാലാം ദിനം രണ്ടാം ഇന്നിങ്‌സ് പുനരാരംഭിച്ച പാകിസ്താനായി വാലറ്റത്ത് 40 റണ്‍സ് നേടി പൊരുതിയ സൊഹൈല്‍ ഖാന്റെ ഒറ്റയാള്‍ പോരാട്ടമാണ് 171 എന്ന സ്‌കോര്‍ സമ്മാനിച്ചത്. കിവികള്‍ക്കായി ബോള്‍ട്ട്, സൗത്തി എന്നിവര്‍ മൂന്നു വീതം വിക്കറ്റുകള്‍ വീഴ്ത്തി.