വടക്കാഞ്ചേരി: എല്ലാവര്‍ക്കും വാസയോഗ്യമായ വീട് പദ്ധതിയുമായി വടക്കാഞ്ചേരി നഗരസഭ. ഇതിന് വേണ്ടി പ്രത്യേക പദ്ധതിക്ക് രൂപം നല്‍കാന്‍ ചെയര്‍പേഴ്‌സണ്‍ ശിവ പ്രിയ സന്തോഷിന്റെ അധ്യക്ഷതയില്‍ ചേര്‍ന്ന യോഗത്തില്‍ തീരുമാനമായി. ഇതിന് മുന്നോടിയായി സമ്പൂര്‍ണ ഭവന പദ്ധതിയുടെ ലഘുലേഖ തയ്യാറാക്കി അയല്‍ സഭ അടിസ്ഥാനത്തില്‍ വിതരണം ചെയും. വീടില്ലാത്തവരെ കണ്ടെത്തുകയാണ് പദ്ധതിയുടെ ആദ്യ ലക്ഷ്യം. ഇതിനായി വിപുലമായ സര്‍വേ നടത്തും 500 വീടിന് ഒരാള്‍ എന്ന നിലയിലാണ് സര്‍വേയര്‍മാരെ നിശ്ചയിക്കുക. ഇവര്‍ക്ക് പ്രത്യേക പരിശീലനം നല്‍കും.വിവരശേഖരണത്തിന് ശേഷം സാധ്യത പട്ടിക തയ്യാറാക്കും. ഇതിനായി വാര്‍ഡ് വികസന സമിതിയുടെ യോഗം വിളിച്ച് ചേര്‍ക്കും സര്‍വേയുടെ ഉദ്ഘാടനം ഡിസംബര്‍ 10 പി.കെ.ബിജു എം.പി നിര്‍വഹിയ്ക്കും. പ്രധാനമന്ത്രി ആവാസ് യോജന വിഹിതമായി ഒന്നര ലക്ഷം, സംസ്ഥാന സര്‍ക്കാര്‍ - 50,000 നഗരസഭ - ഗുണഭോക്തൃവിഹിതം 50,000 രൂപ വീതം എന്നിങ്ങനെ ഒരു ഗുണഭോക്താവിന് മൂന്ന് ലക്ഷം രൂപയാണ് നല്‍കുക. ഈ വര്‍ഷത്തെ വ്യക്തിഗത ഗുണഭോക്താക്കളെ തിരഞ്ഞെടുക്കുന്നതിനുള്ള ഗ്രാമസഭ വിളിച്ച് ചേര്‍ക്കാന്‍ യോഗം തീരുമാനമെടുത്തു ഗുണഭോക്താക്കള്‍ക്കുള്ള അപേക്ഷാ ഫോം അംഗന്‍വാടിയിലൂടേയും അയല്‍ സഭ വഴിയും വിതരണം ചെയ്യും.
വൈസ് ചെയര്‍മാന്‍ എം.ആര്‍ അനൂപ് കിഷോര്‍, സ്ഥിരം സമിതി അധ്യക്ഷന്മാരായ എം.ആര്‍ സോമനാരായണന്‍, എന്‍.കെ പ്രമോദ്കുമാര്‍, ടി.എന്‍ ലളിത, ലൈല നസീര്‍, ജയ പ്രീത മോഹന്‍, എന്നിവര്‍ പങ്കെടുത്ത് സംസാരിച്ചു.