തൃപ്രയാര്‍: തൃപ്രയാര്‍ ഏകാദശിക്ക് ഒരുക്കങ്ങള്‍ പൂര്‍ത്തിയായി. നാളെയാണ് ഏകാദശി. ഇന്ന് ദശമിവിളക്ക്.ഏകാദശി ദിവസം പതിനായിരം പേര്‍ക്കുള്ള ഏകാദശി ഊട്ട് രാവിലെ 10.30ന് തുടങ്ങും. വൈകീട്ട് അഞ്ചുവരെ നീണ്ടുനില്‍ക്കും. ഗോതമ്പ് ചോറും രസക്കാളനും മാങ്ങാച്ചാറുമാണ് വിഭവങ്ങള്‍. ഭക്തര്‍ക്കായി കുടിവെള്ളം, വൈദ്യസഹായം, ആംബുലന്‍സ് സൗകര്യങ്ങള്‍ ഏര്‍പ്പെടുത്തിയിട്ടുണ്ടെന്ന് ദേവസ്വം മാനേജര്‍ എം. മനോജ് കുമാര്‍ അറിയിച്ചു.
ക്ഷേത്രം സിസിടിവി നിരീക്ഷണത്തിലാകും. ആവശ്യമായ പൊലിസ് സേനയെ വിന്യസിക്കും. ഫയര്‍ഫോഴ്‌സും സജ്ജമാക്കിയിട്ടുണ്ട്. ഒരുവര്‍ഷം ആയുരാരോഗ്യസൗഖ്യത്തോടെയായിരിക്കാന്‍ ആനകളുടെ വഴിപാട് എഴുന്നള്ളിപ്പുകളുണ്ടാകും. രാവിലെ 8.30ന് ശീവേലി ആരംഭിക്കും. ഇന്നുരാവിലെ ഏഴുമുതല്‍ സംഗീതോത്സവം തുടരും. ദീപാരാധനയ്ക്കുശേഷം വൈകീട്ട് ആറിന് തൃപ്രയാര്‍ വാദ്യകലാ ആസ്വാദക സമിതിയുടെ ശ്രീരാമപാദ സുവര്‍ണമുദ്ര പുരസ്‌കാരം ഇലത്താള കലാകാരന്‍ ചേര്‍പ്പ് മണിയംപറമ്പില്‍ മണി നായര്‍ക്ക് സമ്മാനിക്കും. രാത്രി 7.30ന് ചെന്നൈ കലാക്ഷേത്രത്തിലെ രേഖാമേനോന്‍ അവതരിപ്പിക്കുന്ന നൃത്തോപാസന.
നാളെ രാത്രി പത്തിന് ദശമിവിളക്ക്. രാവിലെ ഏഴിന് പഞ്ചരത്‌ന കീര്‍ത്തനാലാപനത്തോടെ സംഗീതോത്സവം സമാപിക്കും. ഉച്ചകഴിഞ്ഞ് മൂന്നിന് ശാസ്താവിനെ പുറത്തേക്ക് എഴുന്നള്ളിക്കും. പഞ്ചവാദ്യം, ആനച്ചമയപ്രദര്‍ശനം, മാധവ കലാക്ഷേത്രത്തിന്റെ നൃത്തനൃത്ത്യങ്ങള്‍, നാലിന് മണപ്പുറം ഭാരത് കലാ ക്ഷേത്രയുടെ നൃത്തശില്പം. ആറിന് കിഴക്കേനടയില്‍ സ്‌പെഷല്‍ നാദസ്വരം, ദീപാരാധന, പാദം നൃത്തവിദ്യാലയത്തിന്റെ രാമാര്‍പ്പണം പ്രത്യേക നൃത്തശില്പം. രാത്രി ഏഴിന് ചെങ്കോട്ട ഹരിഹരസുബ്രഹ്മണ്യത്തിന്റെ സംഗീത സദസ്.ഏകാദശിദിവസമായ നാളെ രാവിലെ എട്ടിന് ശീവേലി എഴുന്നള്ളിപ്പ്, മേള കലാരത്‌നം കിഴക്കൂട്ട് അനിയന്‍മാരാര്‍ നയിക്കുന്ന പഞ്ചാരിമേളം. ഉച്ചയ്ക്ക് 12.30ന് കലൈഗാനശിഖരം തിരുമൈഗാനം ടി.പി.എല്‍. രാമനാഥന്‍ നയിക്കുന്ന സ്‌പെഷല്‍ നാദസ്വരം. ഉച്ചകഴിഞ്ഞ് രണ്ടിന് മുരിയാട് മുരളീധരനും സംഘവും അവതരിപ്പിക്കുന്ന ഓട്ടന്‍തുള്ളല്‍, മൂന്നിന് കാഴ്ചശീവേലി, ധ്രുവമേള, വൈകീട്ട് ആറിന് പാഠകം, 6.30ന് ദീപാരാധന, കിഴക്കേടയില്‍ സ്‌പെഷല്‍ നാദസ്വരം. രാത്രി 7.30ന് സ്‌പെഷല്‍ നാദസ്വരം പ്രത്യേക വേദിയില്‍. 11ന് വിളക്കിനെഴുന്നള്ളിപ്പ്, വെടിക്കെട്ട്. 26ന് പുലര്‍ച്ചെമുതല്‍ ദ്വാദശി.