തിരുവനന്തപുരം: അതിര്‍ത്തിയില്‍ തീവ്രവാദികളേയും പാക്കിസ്താന്‍ പട്ടാളത്തേയും ഒരു പോലെ പ്രതിരോധിക്കുന്ന ബി.എസ്.എഫ് ഷൂട്ടര്‍മാര്‍ ഷൂട്ടിങ് റേഞ്ചിലും അജയ്യരായി. 10ാമത് ദേശീയ പൊലിസ് ഷൂട്ടിങ് ചാംപ്യന്‍ഷിപ്പില്‍ വ്യക്തിഗത ടീം ഇനങ്ങളിലായി 13 സ്വര്‍ണം 15 വെള്ളിയും ഏഴു വെങ്കലവും ഉള്‍പ്പടെ 35 മെഡലുകള്‍ നേടിയാണ് ബി.എസ്.എഫ് കിരീടം ചൂടിയത്. ഒന്‍പത് സ്വര്‍ണവും ഏഴു വെള്ളിയും 11 വെങ്കലവും ഉള്‍പ്പടെ 27 മെഡലുകള്‍ നേടിയ സി.ആര്‍.പി.എഫ് റണ്ണേഴ്‌സ് അപ്പായി. ഏഴു സ്വര്‍ണം രണ്ടു വെള്ളിയും അഞ്ചു വെങ്കലവും ഉള്‍പ്പടെ 14 മെഡലുകളുമായി പഞ്ചാബ് പെലിസ് മൂന്നാം സ്ഥാനത്ത് എത്തി. ബി.എസ്.എഫാണ് റൈഫിള്‍, പിസ്റ്റള്‍ ടീം ഇനത്തിലെ മികച്ച പുരുഷ ടീം. റൈഫിളിലെ മികച്ച വനിത ടീമും ബി.എസ്.എഫ് തന്നെ. പിസ്റ്റള്‍ വിഭാഗത്തില്‍ സി.ആര്‍.പി.എഫ്, ബി.എസ്.എഫ് വനിതകള്‍ കിരീടം പങ്കിട്ടു. മികച്ച ഷൂട്ടറായി ബി.എസ്.എഫിലെ ഷംഷേര്‍ സിങിനെ തിരഞ്ഞെടുത്തു.