പള്ളിക്കല്‍: വിദ്യാര്‍ഥികളെയുമായി പോകുുകയായിരുന്ന ഓട്ടോറിക്ഷ മറിഞ്ഞ് അപകടം. കാക്കഞ്ചേരി നവഭാരത് ഇംഗ്ലീഷ് മീഡിയം സ്‌കൂളിലേക്കു വിദ്യാര്‍ഥികളുമായി പോകുകയായിരുന്ന ഓട്ടോയാണ് കുറുന്തലയില്‍ അപകടത്തില്‍പ്പെട്ടത്. ഓട്ടോയിലുണ്ടായിരുന്ന മൂന്നു വിദ്യാര്‍ഥികളും ഡ്രൈവറും പരുക്കേല്‍ക്കാതെ രക്ഷപ്പെട്ടു.
ഇന്നലെ രാവിലെ ഒന്‍പതോടെയായിരുന്നു സംഭവം. പുത്തൂര്‍ ഭാഗത്തുനിന്നു വന്ന ഓട്ടോ കുറുന്തലയില്‍നിന്നു വലത്തോട്ടുള്ള റോഡിലേക്കു പെട്ടെന്നുവെട്ടിത്തിരിച്ചതില്‍ നിയന്ത്രണംവിട്ടു മറിയുകയായിരുന്നു. ഈ സമയം എതിര്‍ദിശയില്‍നിന്നു വന്ന കൊടികുത്തിപറമ്പ് അന്‍സാര്‍ ഇംഗ്ലീഷ് മീഡിയം സ്‌കൂള്‍ ബസ് മുന്നില്‍ ഓട്ടോ മറിയുന്നതുകണ്ടു ബ്രേക്കിട്ടെങ്കിലും ഓട്ടോയില്‍ ഇടിച്ചു.
ബസിനു സ്പീഡ് കുറവായിരുന്നതും വിദ്യാര്‍ഥികളില്ലാതിരുന്നതും കാരണം ദുരന്തം ഒഴിവായി. ഓടിക്കൂടിയ നാട്ടുകാര്‍ മറിഞ്ഞുകിടക്കുന്ന ഓട്ടോയില്‍നിന്നു കുട്ടികളെ പുറത്തെടുത്ത് ആശുപത്രിയിലെത്തിച്ചു. പരിശോധനയില്‍ കുഴപ്പമില്ലെന്നു ഡോക്ടര്‍മാര്‍ അറിയിക്കുകയായിരുന്നു.