പട്ടിക്കാട്: പ്രധാനപ്പെട്ട മൂന്നു തസ്തികകളിലും ഉദ്യോഗസ്ഥരില്ലാത്തതിനാല്‍ വെട്ടത്തൂര്‍ പഞ്ചായത്തിലെ ദൈനംദിന പ്രവര്‍ത്തനങ്ങള്‍ അവതാളത്തിലാകുന്നു. പഞ്ചായത്തിലെ സെക്രട്ടറി നാലു മാസം മുന്‍പു സ്ഥലംമാറിപ്പോകുകയായിരുന്നു. സെക്രട്ടറിയുടെ ചുമതലയുണ്ടായിരുന്ന അസി. സെക്രട്ടറിയെയും ഹെഡ് ക്ലര്‍ക്കിനെയും ആഴ്ചകള്‍ക്കു മുന്‍പു സ്ഥലംമാറ്റി.
ഇവര്‍ക്കു പകരക്കാരെ നിയമിക്കാന്‍ ഇതുവരെ നടപടിയായിട്ടില്ല. പഞ്ചായത്തില്‍ സമര്‍പ്പിക്കേണ്ട വിവിധ അപേക്ഷകളിലും മറ്റും സെക്രട്ടറിയോ ചുമതലപെട്ടവരോ ഒപ്പുവയ്‌ക്കേണ്ടതുണ്ട്. എന്നാല്‍, ഉദ്യോഗസ്ഥരില്ലാത്തതു വിവിധ ആവശ്യങ്ങള്‍ക്കായി പഞ്ചായത്തിലെത്തുന്നവരെ ബുദ്ധിമുട്ടിലാക്കുകയാണ്.
സാമൂഹ്യ സുരക്ഷാ പെന്‍ഷന്‍ വാങ്ങിക്കുന്നവരുടെ സത്യപ്രസ്താവന സ്വീകരിക്കാനുള്ള അവസാന ദിവസം നാളെയാണ്. ഇതില്‍ സെക്രട്ടറിയുടെ ഡിജിറ്റല്‍ ഒപ്പ് സാക്ഷ്യപ്പെടുത്തല്‍ നിര്‍ബന്ധമാണ്. പഞ്ചായത്തില്‍ ഒഴിഞ്ഞുകിടക്കുന്ന തസ്തികകളിലേക്ക് ഉടന്‍ നിയമനം നടത്തി പ്രശ്‌നത്തിനു പരിഹാരം കാണണമെന്ന് പ്രസിഡന്റ് അന്നാമ്മ വള്ളിയാംതടത്തില്‍ ആവശ്യപ്പെട്ടു.