നിലമ്പൂര്‍: മാവോയിസ്റ്റുകള്‍ വെടിയേറ്റു കൊല്ലപ്പെട്ട സാഹചര്യത്തില്‍ നിലമ്പൂര്‍ മേഖലയിലെ ഏഴു പൊലിസ് സ്‌റ്റേഷനുകള്‍ക്കും ആദിവാസി ഊരുകള്‍ക്കും അഭ്യന്തരവകുപ്പ് പ്രത്യേക സുരക്ഷയൊരുക്കും. പടുക്ക വനമേഖലയോടെ ചേര്‍ന്നുകിടക്കുന്ന ആദിവാസി ഊരുകള്‍ക്കാണ് പ്രത്യേക സംരക്ഷണം ഉറപ്പാക്കുന്നത്.
പോത്ത്കല്ല്, വഴിക്കടവ്, എടക്കര, നിലമ്പൂര്‍, പൂക്കോട്ടുംപാടം, കാളികാവ്, കരുവാരകുണ്ട് സ്റ്റേഷനുകള്‍ക്കാണ് പ്രത്യേക സുരക്ഷാസംവിധാനങ്ങള്‍. മാവോയിസ്റ്റുകളുടെ ഭാഗത്തുനിന്നു ഏതുസമയത്തും പ്രത്യാക്രമണം ഉണ്ടാകാമെന്ന ആശങ്കയിലാണിത്. പൊലിസ് സ്‌റ്റേഷനുകള്‍ക്ക് താല്‍ക്കാലിക സംവിധാനങ്ങള്‍ ഒരുക്കിയിട്ടുണ്ടെങ്കിലും പ്രത്യാക്രമണം ഉണ്ടായാല്‍ അത് അപര്യാപ്തമാകുമെന്ന തിരിച്ചറിവാണ് സുരക്ഷാക്രമീകരണങ്ങള്‍ കൂടുതല്‍ ഊര്‍ജിതമാക്കാനുള്ള തീരുമാനത്തിലേക്കെത്തിയത്. അതേസമയം, വനംവകുപ്പ് ഓഫിസുകള്‍ക്കൊന്നും മേഖലയില്‍ കാര്യമായ സുരക്ഷാസംവിധാനം നിലവിലില്ല.