കോളിയടുക്കം: അവസാന മത്സരയിനം വരെ നിലനിന്ന ആകാംക്ഷയ്‌ക്കൊടുവില്‍ കായിക കിരീടത്തില്‍ വീണ്ടും കാസര്‍കോട് ഉപജില്ല മുത്തമിട്ടു. മലയോരത്തിന്റെ കരുത്തുമായി എത്തിയ ചിറ്റാരിക്കാല്‍ ഉപജില്ല കാസര്‍കോടിനു കടുത്ത വെല്ലുവിളിയുയര്‍ത്തി.
ഇഞ്ചോടിഞ്ചു പോരാട്ടത്തിനൊടുവില്‍ അഞ്ചു പോയന്റിന്റെ വ്യത്യാസത്തിലാണു കാസര്‍കോടിന്റെ കിരീടനേട്ടം. ഇവര്‍ 182 പോയന്റ് സ്വന്തമാക്കി. രണ്ടാം സ്ഥാനത്ത് എത്തിയ ചിറ്റാരിക്കാലിനു 177 പോയന്റുണ്ട്. 148 പോയന്റുമായി ചെറുവത്തൂര്‍ മൂന്നാമതെത്തി. മേളയില്‍ അവസാനമായി നടന്ന സീനിയര്‍ ആണ്‍കുട്ടികളുടെ വിഭാഗത്തിലെ 5000 മീറ്റര്‍ ഓട്ടമത്സരത്തിലെ ഫലമാണു ജേതാക്കളെ നിര്‍ണയിച്ചത്. ഈ മത്സരത്തിനു മുന്നേ ഒപ്പത്തിനൊപ്പമായിരുന്നു കാസര്‍കോട്, ചിറ്റാരിക്കല്‍ ഉപജില്ലകള്‍.
ഈയിനത്തില്‍ പെരിയ ഗവ.ഹയര്‍സെക്കന്‍ഡറി സ്‌കൂളിലെ മനുപ്രസാദ് ഒന്നാമതായതോടെ പോയന്റ് കാസര്‍കോടിന്റെ പട്ടികയിലേക്കെത്തി. രണ്ടും മൂന്നും സ്ഥാനങ്ങള്‍ ചെറുവത്തൂര്‍ ഉപജില്ലയിലെ ചീമേനിയും സ്വന്തമാക്കിയതോടെ ചിറ്റാരിക്കല്‍ രണ്ടാംസ്ഥാനത്തേക്കു പിന്തള്ളപ്പെടുകയായിരുന്നു.
കായികമേളയുടെ സമാപന സമ്മേളനത്തില്‍ ചെമ്മനാട് പഞ്ചായത്ത് പ്രസിഡന്റ് കല്ലട്ര അബ്ദുല്‍ഖാദര്‍ സമ്മാനങ്ങള്‍ വിതരണം ചെയ്തു. ഷംസുദ്ദീന്‍ തെക്കില്‍ അധ്യക്ഷനായി. പി.വിജയന്‍, കെ.എം ബല്ലാള്‍, അശോകന്‍ ധര്‍മ്മത്തടുക്ക സംസാരിച്ചു.