എരുമപ്പെട്ടി: വനം വകുപ്പിന്റെ അനുമതിയില്ലാതെ ആനയുടെ അമിത വളര്‍ചയുള്ള കൊമ്പുകള്‍ മുറിച്ച സംഭവത്തില്‍ ഉടമയ്‌ക്കെതിരെ കേസെടുത്തു. വനം വകുപ്പിന്റെ ഡാറ്റാ ബുക്ക് ലഭിച്ചിട്ടുള്ള ആന കളരിക്കാവ് അമ്പാടി കണ്ണന്റെ കൊമ്പുകളാണ് വനം വകുപ്പിന്റെ അനുമതിയില്ലാതെ ഉടമ മുറിച്ചത്.
കേരള നാട്ടാന പരിപാലന ചട്ടപ്രകാരം നാട്ടാനയുടെ അമിത വളര്‍ച്ചയുള്ള കൊമ്പുകള്‍ മുറിക്കണമെങ്കില്‍ മുഖ്യ വന്യജീവി പരിപാലകന്റെ പ്രത്യേക അനുമതി വേണം എന്നാണ് നിയമം.
എന്നാല്‍ ഈ ചട്ടം ലംഘിച്ചാണ് അമ്പാടി കണ്ണന്റെ കൊമ്പുകള്‍ മുറിച്ച് നീക്കി ചീകി മിനുക്കിയത്. വനം വകുപ്പിന് ലഭിച്ച പരാതിയുടെ അടിസ്ഥാനത്തിലാണ് തൃശ്ശൂര്‍ സാമൂഹിക വനവല്‍ക്കരണ വിഭാഗം റെയ്ഞ്ച് ഓഫിസര്‍ ഇ.എസ് സദാനന്റെ നേതൃത്വത്തില്‍ അന്വേഷണം നടത്തിയാണ് ആനയുടെ ഉടമ ഇരിങ്ങപ്പുറം മാത്രംകോട്ട് നിധിന്റെ പേരില്‍ വനം വകുപ്പ് കേസെടുത്തിട്ടുള്ളത്.
എയ്യാലില്‍ സ്വകാര്യ വ്യക്തിയുടെ പറമ്പില്‍ തളച്ചിട്ടുള്ള ആനയെ കോന്നി വനംവകുപ്പ് മൃഗ സംരക്ഷണ ഉദ്യോഗസ്ഥന്‍ സി.എസ്. ജയകുമാര്‍ പരിശോധിച്ച് അമിത വളര്‍ച്ചയുള്ള കൊമ്പുകള്‍ മുറിച്ച് നീക്കിയിട്ടുണ്ടെന്ന് കണ്ടെത്തി. വനം വകുപ്പ് ഉദ്യോഗസ്ഥരായ കെ.എസ്. വേലായുധന്‍, പി. ബാബുരാജ്, മുഹമ്മദ് ഷെരീഫ് എന്നിവരും അന്വേഷണ സംഘത്തില്‍ ഉണ്ടായിരുന്നു.