അരിമ്പൂര്‍: കഞ്ചാവ് വില്‍പനക്കാരനെ കയ്യോടെ പിടികൂടി പൊലിസിലേല്‍പിച്ച യുവാക്കളെ ആക്രമിച്ച കേസില്‍ രണ്ട് യുവാക്കളെ അന്തിക്കാട് പൊലിസ് അറസ്റ്റ് ചെയ്തു.
തൃശൂര്‍ കണിമംഗലം സ്വദേശി ' കരയക്കാട്ടില്‍ അജിത്ത് (20) മനക്കൊടി സ്വദേശി കിരണ്‍ കരയക്കാട്ടില്‍ (18) എന്നിവരാണ് അറസ്റ്റിലായത്. ചേര്‍പ്പ് സി.ഐ പി.കെ. മനോജ് കുമാര്‍, അന്തിക്കാട് എസ്.ഐ പി.എം വിമോദ് എന്നിവരുടെ നേതൃത്വത്തിലാണ് പൊലിസ് ഇവരെ പിടികൂടിയത്. ആക്രമണ കേസില്‍ അഞ്ച് പേരെ കൂടി പിടികിട്ടാനുണ്ട്. കഴിഞ്ഞ ഞായറാഴ്ചയാണ് കേസിനാസ്പദമായ സംഭവം. മനക്കൊടികുന്നില്‍ കഞ്ചാവ് വില്‍പ്പന നടത്തിയിരുന്ന യുവാവിനെ കയ്യോടെ പിടിച്ച് പൊലിസിന് നല്‍കിയ മനക്കൊടി സ്വദേശികളായ പി.പി.നിഖില്‍. സഹോദങ്ങളായ ടി.ബി.വൈശാഖ്, വൈശേഷ് എന്നിവരെയാണ് കഞ്ചാവ് മാഫിയ സംഘം ഇരുമ്പ് ദണ്ഡ്, വടി, സോഡ കുപ്പികള്‍ എന്നിവ ഉപയോഗിച്ച് ആക്രമിച്ചത്.
ഗുരുതരമായി പരുക്കേറ്റ മൂന്ന് പേരും തൃശൂരില്‍ വിവിധ ആശുപത്രികളില്‍ ചികിത്സയിലായിരുന്നു. അടിയന്തിര ശാസ്ത്രക്രിയക്ക് വിധേയനായ വൈശേഷ് ഒഴിച്ച് മറ്റ് രണ്ട് പേരും ആശുപത്രി വിട്ടു.