കോഴിക്കോട്: പാവമണി റോഡില്‍ പ്രവര്‍ത്തിക്കുന്ന മദ്യഷാപ്പുകള്‍ക്കെതിരേ പ്രതിഷേധം ശക്തമാകുന്നു. നിലവിലുള്ള രണ്ടു മദ്യഷാപ്പുകള്‍ക്കു പുറമെ പുതിയ മദ്യ സൂപ്പര്‍മാര്‍ക്കറ്റു കൂടി ആരംഭിച്ചതിനെ തുടര്‍ന്നാണു പ്രദേശവാസികളും മദ്യവിരുദ്ധ സമിതിയും പ്രതിഷേധം ശക്തമാക്കിയത്.
മദ്യം വാങ്ങി അവിടെ നിന്നു തന്നെ കുടിക്കുകയും ഫൂട്ട്പാത്തില്‍ കിടക്കുകയും ചെയ്യുന്ന അവസ്ഥയാണു നിലവിലുള്ളത്. ഇതുമൂലം പകല്‍ പോലും ഇതിലെ ആളുകള്‍ക്കു വഴിനടക്കാന്‍ സാധിക്കാത്ത അവസ്ഥയാണുള്ളത്. മദ്യം കഴിച്ചിറങ്ങുന്നവര്‍ പലപ്പോഴും റോഡിലൂടെ നടന്നുപോകുന്നവരെ ചീത്ത വിളിക്കുന്നതും പതിവാണെന്നു പ്രദേശവാസികള്‍ ആരോപിക്കുന്നു.
മദ്യം വാങ്ങാനെത്തുന്നവരെക്കൊണ്ടു പൊറുതിമുട്ടിയ അവസ്ഥയിലാണ് പാവമണി റോഡിലെ കച്ചവടക്കാരും. സാധനം വാങ്ങി ഇവര്‍ പണം നല്‍കാതിരിക്കുന്നതും പണം ആവശ്യപ്പെടുമ്പോള്‍ ബഹളം വയ്ക്കുന്നതും പതിവാണെന്നു കച്ചവടക്കാര്‍ പറയുന്നു. ഒരുനിലക്കും മദ്യഷാപ്പുകള്‍ നടത്താനനുവദിക്കില്ലെന്ന നിലപാടിലാണു നാട്ടുകാരും മദ്യവിരുദ്ധ സമിതിയും.
കഴിഞ്ഞ ദിവസം മദ്യഷാപ്പുകളിലേക്കു ബഹുജന ധര്‍ണയും സംഘടിപ്പിച്ചിരുന്നു. മദ്യസൂപ്പര്‍ മാര്‍ക്കറ്റിന്റെ ഗ്ലാസുകള്‍ പ്രതിഷേധക്കാര്‍ അടിച്ചുതകര്‍ക്കുകയും ചെയ്തു.