പുല്‍പ്പള്ളി: കാലാവസ്ഥ വ്യതിയാനത്താല്‍ കര്‍ഷകര്‍ പ്രതിസന്ധിയില്‍. കബനി തീരപ്രദേശങ്ങളോട് ചേര്‍ന്ന കൃഷിയിടങ്ങളെല്ലാം കരിഞ്ഞുണങ്ങി. മഴ പ്രതീക്ഷിച്ച് കൃഷിയിറക്കിയ കര്‍ഷകരും ദുരിതത്തിലായി. നെല്‍കൃഷിയില്‍ നിന്ന് വരുമാനം തീരെ ലഭിക്കാത്ത അവസ്ഥയാണിപ്പോള്‍. കൂലി ചെലവിനുള്ള പണം പോലും പുറമെ നിന്ന് കണ്ടെത്തേണ്ട അവസ്ഥയാണ്. കുരുമുളകും കാപ്പിയുമെല്ലാം വിളവെടുപ്പിന് പാകമായി നില്‍ക്കുന്നു. എന്നാല്‍ ഉത്പാദനം തീരെ കുറവാണ്. കഴിഞ്ഞ ജനുവരി മുതല്‍ ഇതുവരെ കനത്ത ചൂടില്‍ വ്യാപകമായി കൃഷിനാശമുണ്ടായി. കഴിഞ്ഞ തവണത്തെ വരള്‍ച്ചയില്‍ കൃഷിനശിച്ച കര്‍ഷകര്‍ക്ക് പണമനുവദിച്ചെന്ന് പ്രഖ്യാപിച്ചെങ്കിലും കര്‍ഷകര്‍ക്ക് ഇതുവരെ പണം ലഭിച്ചിട്ടില്ല.
കൃഷിനാശത്തിന് പുറമെ ആവശ്യമായ നഷ്ടപരിഹാരം അനുവദിക്കുന്നതില്‍ അധികൃതര്‍ അലംഭാവം കാണിക്കുകയാണെന്നാണ് കര്‍ഷകര്‍ പറയുന്നത്. ഈ മാസം കൂടി കഴിയുന്നതോടെ കനത്ത ചൂടില്‍ കൃഷിനാശം ഇനിയുമുണ്ടാകുമോയെന്ന ഭയത്തിലാണ് കര്‍ഷകര്‍. ഇനിയെങ്കിലും വരള്‍ച്ചയെ പ്രതിരോധിക്കാനുള്ള പദ്ധതികള്‍ തയാറാക്കിയില്ലെങ്കില്‍ അതിര്‍ത്തി മേഖലയിലെ കര്‍ഷകര്‍ രൂക്ഷമായ വരള്‍ച്ചയെ അഭിമുഖീകരിക്കേണ്ടിവരും.