തിരൂരങ്ങാടി: മതം മാറിയതിന്റെ പേരില്‍ ആര്‍.എസ്.എസുകാര്‍ വെട്ടിക്കൊലപ്പെടുത്തിയ ഫൈസലിന്റെ കുടുംബത്തിന്റെ കണ്ണീരൊപ്പാന്‍ കടലിനക്കരെനിന്നും അറബികളെത്തി. ഫുജൈറയിലെ പൊലിസ് ഉദ്യോഗസ്ഥനായ സൈഫ് ഉബൈദ്, പിതാവ് ഉബൈദ് ഉബൈദ് എന്നിവരാണ് ഇന്നലെ വൈകിട്ട് കൊടിഞ്ഞിയില്‍ ഫൈസലിന്റെ കുടുംബത്തെ സന്ദര്‍ശിച്ചത്.
ഫൈസലിന്റെ ഖബര്‍ സിയാറത്തിനുശേഷം വീട്ടിലെത്തിയ അവര്‍ മാതാവിനെയും, മക്കളെയും ആശ്വസിപ്പിച്ചു. ഫൈസല്‍ വധം മാധ്യമങ്ങളിലൂടെയാണ് അറിഞ്ഞത്. ഫൈസലിന്റെ കുടുംബത്തിന് കഴിയാവുന്ന എല്ലാ സഹായങ്ങളും നല്‍കുമെന്നും ഉബൈദ് ഉബൈദ് പറഞ്ഞു.
ഇരുവരും നാളെ ഫുജൈറയിലേക്ക് തിരിക്കും. എസ്.കെ.എസ്.എസ്.എഫ് ജില്ലാ പ്രസിഡന്റ് ഫക്രുദ്ദീന്‍ ഹസനി തങ്ങള്‍, പി.എ മുഹമ്മദ് മൗലവി, യു.പി മുഹമ്മദലി ഖാസിമി, എം.സൈതലവി,മൂസക്കുട്ടിഹാജി, പി.കെ മുഹമ്മദ് അനുഗമിച്ചു.