ഫറോക്ക്: പുഴയോരത്ത് അനധികൃതമായി കൂട്ടിയിട്ട മണല്‍ പിടിച്ചെടുത്തു. ചാലിയാര്‍ തീരത്ത് കോടമ്പുഴ കല്ലടകടവില്‍ കൂട്ടിയിട്ട ഒരു ലോഡ് മണലാണ് രാമനാട്ടുകര വില്ലേജ് ഓഫിസറുടെ നേതൃത്വത്തില്‍ പിടിച്ചെടുത്തത്. രഹസ്യവിവരത്തെ തുടര്‍ന്നു ഇന്നലെ രാവിലെ നടത്തിയ പരിശോധനയിലാണ് പുഴയോരത്തു മണല്‍ കൂട്ടിയിട്ടത് കണ്ടെത്തിയത്. ചാലിയാറില്‍ നിന്നു വാരിയെടുത്ത മണലാണ് കൂട്ടിയിട്ടിരുന്നത്. ചാലിയാറില്‍ അനധികൃത മണലൂറ്റ് വ്യാപകമാകുന്നതായി നേരത്തെ പരാതിയുയര്‍ന്നിരുന്നു. പിടിച്ചെടുത്ത മണല്‍ 3600 രൂപക്ക് ലേലം ചെയ്തു. വില്ലേജ് ഓഫിസര്‍ പ്രദീപ്കുമാര്‍, എസ്.വി.ഒ പ്രസാദ് പി.ടി എന്നിവരുടെ നേതൃത്വത്തിലാണ് പരിശോധന നടത്തിയത്.