പോത്തന്‍കോട്: കൊയ്ത്തൂര്‍ക്കോണത്ത് വീടിന്റെ മതില്‍ക്കെട്ടിനുള്ളില്‍ നിര്‍ത്തിയിട്ടിരുന്ന കാര്‍ തീയിട്ടു നശിപ്പിച്ചു. കാരമൂട് നവാസ് മന്‍സിലില്‍ ഷാനവാസിന്റെ കാറാണ് അജ്ഞാതര്‍ നശിപ്പിച്ചത്.
ബന്ധുവായ മന്നത്ത് വീട്ടില്‍ കബീറിന്റെ വീട്ടിലാണ് കാര്‍ ഇട്ടിരുന്നത്. ചൊവ്വാഴ്ച പുലര്‍ച്ചെ രണ്ടരയോടെ വലിയ ശബ്ദം കേട്ട് വീട്ടുകാര്‍ ഉണര്‍ന്നു നോക്കിയപ്പോഴാണ് സംഭവം കണ്ടത്. കഴക്കൂട്ടം, ആറ്റിങ്ങല്‍ എന്നിവിടങ്ങളില്‍ നിന്നെത്തിയ അഗ്നിശമന സേനാംഗങ്ങളാണ് തീയണച്ചത്. അഞ്ചു മാസങ്ങള്‍ക്ക് മുമ്പ് ഷാനവാസിന്റെ വീട്ടിലുണ്ടായിരുന്ന കാര്‍ സമാന രീതിയില്‍ കത്തി നശിച്ചിരുന്നു. പരാതിയില്‍ കേസെടുത്തതായും സംഭവത്തിനു പിന്നില്‍ വ്യക്തി വൈരാഗ്യമാണെന്ന് സംശയിക്കുന്നതായും മംഗലപുരം പൊലിസ് പറഞ്ഞു.