ഭരണസ്വാധീനം ഉപയോഗിച്ചെന്ന് ആക്ഷേപം
പയ്യോളി: തിക്കോടി ഗ്രാമപഞ്ചായത്ത് സെക്രട്ടറിയെ സ്ഥലം മാറ്റി പത്തുദിവസം കഴിഞ്ഞിട്ടും പകരം സെക്രട്ടറി ചുമതലയേറ്റില്ല. തിക്കോടി മൂടാടി പഞ്ചായത്തിലേക്കാണ് സ്ഥലം മാറ്റിയത്. 2017 മെയ് മാസം റിട്ടയര്‍ ചെയ്യാനിരിക്കുന്ന മൂടാടി പഞ്ചായത്ത് സെക്രട്ടറിയെ തിക്കോടിയിലേക്കാണ് സ്ഥലം മാറ്റിയത്. ഇയാള്‍ ഇതുവരെ തിക്കോടിയില്‍ ചാര്‍ജ്ജെടുത്തിട്ടില്ല.
ഭരണസ്വാധീനമുപയോഗിച്ചാണ് സ്ഥലം മാറ്റം നടന്നതെന്നാണ് ആക്ഷേപം. തിക്കോടി പഞ്ചായത്തില്‍ സെക്രട്ടറിയും അസിസ്റ്റന്റ് സെക്രട്ടറിയും ഇല്ലാത്ത അവസ്ഥയാണ്. ഹെഡ് ക്ലാര്‍ക്കിനാണ് സെക്രട്ടറിയുടെ ചുമതല നല്‍കിയിരിക്കുന്നത്. പഞ്ചായത്തിന്റെ നിര്‍വഹണഘട്ടത്തിലും നിരവധി പരിപാടികള്‍ നടപ്പിലാക്കുന്ന അവസരത്തിലും തിക്കോടി പഞ്ചായത്ത് സെക്രട്ടറിയെ സ്ഥലം മാറ്റിയതില്‍ വലിയ പ്രതിഷേധമാണ് നാട്ടുകാര്‍ക്കുള്ളത്.