നെയ്യാറ്റിന്‍കര: ആഡംബര കാറില്‍ കടത്തിയ 500 കിലോ (15 ചാക്ക്) ലഹരി വസ്തുക്കളുമായി യുവാവ് അറസ്റ്റില്‍.
ബാലരാമപുരം ആര്‍.സി സ്ട്രീറ്റില്‍ എല്‍.എല്‍.ജെ ഹൗസില്‍ ജോസഫിന്റെ മകന്‍ ജോജോ (29) ആണ് പിടിയിലായത്. വ്യാഴാഴ്ച രാത്രിയാണ് ഇയാള്‍ എക്‌സൈസ് സംഘത്തിന്റെ കെണിയില്‍പ്പെട്ടത്. അമരവിള എക്‌സെസ് ചെക്ക്‌പോസ്റ്റില്‍ നിര്‍ത്താതെ ഫോര്‍ഡ് ഐക്കണ്‍ കാറില്‍ നിരോധിത പുകയില ഉല്‍പ്പന്നങ്ങള്‍ കടത്തികൊണ്ട് വരുന്നതായി വിവരം ലഭിച്ചതിന്റെ അടിസ്ഥാനത്തില്‍ നെയ്യാറ്റിന്‍കര എക്‌സെസ് ഇന്‍സ്‌പെക്ടര്‍ പി.എല്‍ ഷിബുവിന്റെ നേതൃത്വത്തില്‍ നടത്തിയ പരിശോധനയില്‍ നെയ്യാറ്റിന്‍കരയ്ക്ക് സമീപം കൂട്ടപ്പനയില്‍ നിന്നും കാറില്‍ കടത്തിയ 500 കിലോ പുകയില ഉല്‍പ്പന്നങ്ങളാണ് പിടിച്ചെടുത്തത്.
കാറും പ്രതിയെയും കസ്റ്റഡിയിലെടുത്തിട്ടുളളതായി എക്‌സൈസ് സംഘം അറിയിച്ചു. പുകയില ഉല്‍പ്പന്നങ്ങള്‍ തമിഴ്‌നാട്ടില്‍ നിന്നും കടത്തി ക്കൊണ്ടുവന്നതാണെന്ന് പ്രതി പറഞ്ഞു.