തൃശൂര്‍: നോട്ട് അസാധുവാക്കി പ്രധാനമന്ത്രിയുംറേഷന്‍ അരിനല്‍കാതെ മഖ്യമന്ത്രിയും  ജനങ്ങളെ ദ്രോഹിക്കുകയാണെന്ന്  കെ.പി.സി.സി വൈസ് പ്രസിഡന്റ് വി.ഡി സതീശന്‍ എം.എല്‍.എ.പറഞ്ഞു.
കേരള മുനിസിപ്പല്‍ ആന്റ് കോര്‍പ്പറേഷന്‍ സ്റ്റാഫ് അസോസിയേഷന്‍ 40-ാം സംസ്ഥാന സമ്മേളനം തൃശൂരില്‍  ഉദ്ഘാടനം ചെയ്യുകയായിരുന്നു അദ്ദേഹം. മൊബൈല്‍ ആപ്പ് ഉപയോഗിച്ച് പണവിനിമയം നടത്താനാണ് പ്രധാനമന്ത്രി ജനങ്ങളോട് ആവശ്യപ്പെടുന്നത്. എന്താണ് ഇതിന് സാധാരണക്കാരുടെ  കയ്യിലുള്ളത്. രാജ്യത്തെ 25ശതമാനം ജനങ്ങള്‍ക്ക് മാത്രമാണ് സാങ്കേതികവിദ്യകള്‍ ഉപയോഗിക്കാന്‍ അറിയൂ.
നരേന്ദ്രമോദി  പ്രധാനമന്ത്രിയായതും മുന്തിയ നോട്ടുകള്‍ അസാധാവുക്കിയതും അറിയാത്ത ഗ്രാമീണര്‍ ഇന്നും രാജ്യത്ത് വിദൂരഗ്രാമങ്ങളില്‍ ജീവിക്കുന്നുണ്ട്. വിനിമയം ചെയ്യപ്പെടേണ്ട മാധ്യമമാണ് കറന്‍സി .ആര്‍ക്കും പണമില്ലാത്ത അവസ്ഥയാണ് ഇന്നുള്ളത്. ജനങ്ങളുടെ ജീവിതദുരിതം വര്‍ദ്ധിപ്പിച്ചതല്ലാതെ ഒരു മാറ്റവും കറന്‍സി പിന്‍വലിച്ചതുകൊണ്ട് ഉണ്ടായില്ല.
ജനങ്ങളെ ദുരിതത്തിലാക്കുന്നതില്‍ മത്സരിക്കുകയാണ് കേന്ദ്രസര്‍ക്കാരും സംസ്ഥാനസര്‍ക്കാരും. ഒന്നരമാസമായി കേരളത്തില്‍ അരിവിതരണം നടക്കുന്നില്ല. അരി കയറ്റിയിറക്കുന്നത് സംബന്ധിച്ച തര്‍ക്കമാണ് അരിവിതരണം മുടങ്ങിയതിന് കാരണമായി പറയുന്നത്. അത് പരിഹരിക്കാന്‍ പോലും സംസ്ഥാനസര്‍ക്കാരിന് കഴിഞ്ഞില്ലെന്ന് വി.ഡി സതീശന്‍ കുറ്റപ്പെടുത്തി.
സംസ്ഥാന പ്രസിഡന്റ് ബി. ശശികുമാര്‍ അധ്യക്ഷനായി. വി.ടി ബല്‍റാം എം.എല്‍.എ ,സംസ്ഥാന ജനറല്‍ സെക്രട്ടറി പി.ഐ ജേക്കബ്‌സണ്‍, സുന്ദരന്‍ കുന്നത്തുള്ളി,ജോസ് വള്ളൂര്‍,സി. ജയകുമാര്‍, ഷാഹിന്‍ മെഹബൂബ്, ടി.എ രാധാകൃഷ്ണന്‍, കൈമനം പ്രഭാകരന്‍, എം. വസന്തന്‍, എന്‍.കെ ബെന്നി, എ. പ്രസാദ്, സി.ബി ഗീത,   ജേക്കബ് പുലിക്കോട്ടില്‍ പങ്കെടുത്തു. ഇന്ത്യന്‍ സംസ്‌കാരത്തിന്റെ ബഹുസ്വരത എന്ന വിഷയത്തില്‍ മുന്‍ പി.എസ്.സി ചെയര്‍മാന്‍ ഡോ.കെ.എസ് രാധാകൃഷ്ണന്‍ പ്രഭാഷണം നടത്തി.