തളിപ്പറമ്പ്: പരിയാരം കൊളപ്രത്ത് തീപിടിത്തം. സ്വകാര്യ വ്യക്തിയുടെ 25 ഏക്കറോളം സ്ഥലത്തെ മരങ്ങള്‍ കത്തിനശിച്ചു. ഇന്നലെ ഉച്ചക്ക് രണ്ടരയോടെയായിരുന്നു കൊളപ്രം ശ്മശാനത്തിന് സമീപത്തുനിന്നു പടര്‍ന്നുപിടിച്ച തീ കാറ്റില്‍ മറ്റിടങ്ങളിലേക്ക് വ്യാപിച്ചത്. പയ്യന്നൂര്‍ അഗ്നിശമന സേന സ്റ്റേഷന്‍ ഓഫിസര്‍ ജി ജയകുമാറിന്റെയും ലീഡിങ്ങ് ഫയര്‍മാന്‍ ഗോകുല്‍ദാസിന്റെയും നേതൃത്വത്തിലെത്തിയ സംഘം രണ്ടരമണിക്കൂറോളം ശ്രമിച്ചാണ് തീ നിയന്ത്രണ വിധേയമാക്കിയത്. ഉര്‍സുലൈന്‍ സീനിയര്‍ സെക്കന്‍ഡറി സ്‌കൂളിനു സമീപം വരെ തീ എത്തിയെങ്കിലും നിയന്ത്രണവിധേയമാക്കിയതിനാല്‍ കൂടുതല്‍ നാശനഷ്ടങ്ങളുണ്ടായില്ല.