തളിപ്പറമ്പ് : പരിയാരം ഏമ്പേറ്റില്‍ എട്ടു കടകളില്‍ മോഷണശ്രമം. കടകള്‍ കുത്തിത്തുറക്കാനുപയോഗിച്ച കമ്പിപ്പാരയും മോഷ്ടിച്ച ലാപ്‌ടോപ്പും ഉപേക്ഷിച്ച നിലയില്‍ കണ്ടെത്തി. ദേശീയപാതയില്‍ ഏമ്പേറ്റ് സ്റ്റോപ്പിലെ കള്ളുഷാപ്പ്, ഹോട്ടല്‍, ഫാന്‍സി, സ്റ്റുഡിയോ, പൂന്തോട്ട നിര്‍മാണ ഓഫിസ്, പരിയാരം സഹകരണ ബാങ്കിന്റെ ശാഖ പ്രവര്‍ത്തിച്ചിരുന്ന മുറി, ബാര്‍ബര്‍ ഷോപ്പ്, ഇറച്ചിക്കട എന്നിവിടങ്ങളിലാണു മോഷണശ്രമം നടന്നത്.
ഇറച്ചിക്കടയില്‍ ഉണ്ടായിരുന്ന ലാപ്‌ടോപ്പാണ് ഉപേക്ഷിച്ച നിലയില്‍ സ്റ്റുഡിയോയുടെ വരാന്തയില്‍ നിന്നു കണ്ടെത്തിയത്. പൂട്ടുകള്‍ തകര്‍ത്താണ് അകത്തു കടന്നത്. സ്റ്റുഡിയോയുടെ ഓഫിസ് മുറിയിലെ സാധനങ്ങള്‍ വലിച്ചിട്ട നിലയിലാണ്. ഒന്നും നഷ്ടപ്പെട്ടില്ലെന്നു കടയുടമകള്‍ പറഞ്ഞു.
പുലര്‍ച്ചെ നടക്കാനിറങ്ങിയവരാണു കടകള്‍ തുറന്നിട്ട നിലയില്‍ കണ്ട് ഉടമസ്ഥരെ വിവരമറിയിച്ചത്. അഡി. എസ്.ഐ പ്രഭാകരന്റെ നേതൃത്വത്തില്‍ സ്ഥലത്തെത്തിയ പൊലിസ് പരിശോധന നടത്തി.