ഇംഫാല്‍: മണിപ്പൂരില്‍ ഭീകരരുടെ പതിയിരുന്നുള്ള ആക്രമണത്തില്‍ നാല് പൊലിസുകാര്‍ കൊല്ലപ്പെട്ടു. പട്രോളിങ് നടത്തുകയായിരുന്ന സംഘത്തിനു നേരെയാണ് ആക്രമണമുണ്ടായതെന്ന് പൊലിസ് അറിയിച്ചു. മണിപ്പൂരിലെ ചന്ദല്‍ ജില്ലയിലെ രണ്ടിടങ്ങളിലായിട്ടാണ് പതിയിരുന്നുള്ള ആക്രമണമുണ്ടായത്.
ആദ്യത്തെ ആക്രമണമുണ്ടായത് മോറെ ടൗണില്‍ നിന്നും 21 കി.മീറ്റര്‍ മാറിയുള്ള ലോക്ചാവോയിലായിരുന്നു. പുതിയതായി രൂപീകരിക്കപ്പെട്ട തെങ്‌നോപല്‍ ജില്ലയുടെ ഉദ്ഘാടനത്തിനായി മുഖ്യമന്ത്രി ഇബോബി സിങ് എത്തുന്നതുമായി ബന്ധപ്പെട്ട സുരക്ഷാ പരിശോധനക്ക് പോവുകയായിരുന്നു പൊലിസ് സംഘം.
ഇതിനിടയിലാണ് ആക്രമണമുണ്ടായത്. സംഭവത്തില്‍ മൂന്ന് പൊലിസുകാര്‍ മരിക്കുകയും മൂന്നുപേര്‍ക്ക് പരുക്കേല്‍ക്കുകയും ചെയ്തു.
മറ്റൊരു സംഭവമുണ്ടായത് ബോങ് യാങിലായിരുന്നു. ഈ ആക്രമണത്തില്‍ ഒരു പൊലിസുകാരന്‍ മരിച്ചു.