ആലപ്പുഴ: ജില്ലാതല കേരളോത്സവത്തിന്റെ ഉദ്ഘാടനം മുതുകുളം പുതിയവിള ഗവണ്‍മെന്റ് എല്‍.പി. സ്‌കൂളില്‍ ഇന്ന് ൃ നടക്കും. ഉച്ചകഴിഞ്ഞ് മൂന്നിന് സാംസ്‌കാരിക ഘോഷയാത്രയോടെ പരിപാടികള്‍ ആരംഭിക്കും. വൈകിട്ട് അഞ്ചിന് പൊതുമരാമത്ത് വകുപ്പു മന്ത്രി ജി. സുധാകരന്‍ ഉദ്ഘാടനം നിര്‍വഹിക്കും. ജില്ലാ പഞ്ചായത്ത് പ്രസിഡന്റ് ജി. വേണുഗോപാല്‍ ആധ്യക്ഷ്യം വഹിക്കും. ജില്ലാ കളക്ടര്‍ വീണ എന്‍. മാധവന്‍ മുഖ്യാതിഥിയാണ്.
യുവജനക്ഷേമ ബോര്‍ഡ് വൈസ് ചെയര്‍മാന്‍ പി. ബിജു, കായംകുളം നഗരസഭാധ്യക്ഷന്‍ എന്‍. ശിവദാസന്‍, മുതുകുളം ബ്ലോക്ക് പഞ്ചായത്ത് പ്രസിഡന്റ് അഡ്വ. ബിപിന്‍ സി. ബാബു, കായംകുളം സ്പിന്നിങ് മില്‍ ചെയര്‍മാന്‍ എം.എ. അലിയാര്‍ എന്നിവര്‍ മുഖ്യപ്രഭാഷണം നടത്തും.ചേപ്പാട് എന്‍.റ്റി.പി.സി. മൈതാനം, കണ്ടല്ലൂര്‍ മാടമ്പില്‍ ഗവണ്‍മെന്റ് യു.പി. സ്‌കൂള്‍, മാടമ്പില്‍ ശ്രീഭദ്ര ഓഡിറ്റോറിയം, നങ്ങ്യാര്‍കുളങ്ങര ബഥനി സ്‌കൂള്‍ എന്നിവിടങ്ങളാണ് വേദി. 17, 18 തീയതികളിലായി വിവിധ കലാ കായിക മത്സരങ്ങള്‍ നടക്കും. ഇന്ന് ഉച്ചകഴിഞ്ഞ് രണ്ടിന് എന്‍.റ്റി.പി.സി. മൈതാനത്ത് ഫുട്‌ബോള്‍, ക്രിക്കറ്റ് മത്സരങ്ങള്‍ നടക്കും.
നാളെ (ഡിസംബര്‍ 17) വോളിബോള്‍ മത്സരം കൃഷ്ണപുരം പഞ്ചായത്തിലും, ബാസ്‌ക്കറ്റ് ബോള്‍ മത്സരം ബഥനി സ്‌കൂളിലും നടക്കും. ചെസ് മത്സരവും പഞ്ചഗുസ്തി മത്സരവും മാടമ്പില്‍ ഗവണ്‍മെന്റ് യു.പി.എസിലും ഷട്ടില്‍ ബാഡ്മിന്റണ്‍ ഹരിപ്പാട് റോജൂസ് അക്കാദമിയിലും കബഡി മുതുകുളം എസ്.എന്‍.എം.യു.പി.എസിലും നടക്കും. 18ന് കളരിപ്പയറ്റ് മത്സരം മാടമ്പില്‍ ഗവണ്‍മെന്റ് യു.പി.എസിലും വടംവലി എന്‍.റ്റി.പി.സി. മൈതാനത്തും നടക്കും.
നാളെ രാവിലെ 10 മുതല്‍ തിരുവാതിര, ഭരതനാട്യം, കുച്ചുപ്പുടി, മോഹനിയാട്ടം, കേരള നടനം, നടോടിനൃത്തം, മാര്‍ഗംകളി, സംഘനൃത്തം എന്നിവ വേദി ഒന്നില്‍ (മാടമ്പില്‍ ശ്രീഭദ്ര ഓഡിറ്റോറിയം) നടക്കും. കഥകളി, ഓട്ടന്‍തുള്ളല്‍, ചെണ്ടമേളം,. ചെണ്ട, മദ്ദളം, കഥകളിപ്പദം, നടോടിപ്പാട്ട്, വള്ളംകളിപാട്ട് എന്നിവ വേദി രണ്ടിലും(മാടമ്പില്‍ ഗവണ്‍മെന്റ് യു.പി.എസ്.) പ്രസംഗം, കവിതാലാപന മത്സരങ്ങള്‍ വേദി മൂന്നിലും (മാടമ്പില്‍ ഗവണ്‍മെന്റ് യു.പി.എസ്.) നടക്കും. ഉപന്യാസരചനയും പെന്‍സില്‍ ഡ്രോയിങും രാവിലെ 10നും കഥാരചന, പെയിന്റിങ്(ജലഛായം) എന്നിവ ഉച്ചയ്ക്ക് 12 നും കവിതാരചന, കാര്‍ട്ടൂണ്‍ മത്സരങ്ങള്‍ ഉച്ചകഴിഞ്ഞ് 2.30നും നടക്കും.
18ന് രാവിലെ 9.30 മുതല്‍ കര്‍ണാടക സംഗീതം, വായ്പാട്ട്, ലളിതഗാനം, സംഘഗാനം, ദേശഭക്തി ഗാനം, ദഫ്മൂട്ട്, വട്ടപ്പാട്ട്, ഒപ്പന, കോല്‍ക്കളി മത്സരങ്ങള്‍ വേദി ഒന്നില്‍ (മാടമ്പില്‍ ശ്രീഭദ്ര ഓഡിറ്റോറിയം) നടക്കും. മോണോ ആക്ട്, മിമിക്രി, മൈം, കഥാപ്രസംഗം, നാടകം എന്നിവ വേദി രണ്ടില്‍(മാടമ്പില്‍ ഗവണ്‍മെന്റ് യു.പി.എസ്.) നടക്കും. മാപ്പിളപ്പാട്ട്, ഉപകരണ സംഗീത മത്സരങ്ങള്‍ വേദി മൂന്നിലും (മാടമ്പില്‍ ഗവണ്‍മെന്റ് യു.പി.എസ്.) നടക്കും.
സമാപന സമ്മേളനവും സമ്മാന വിതരണവും 18ന് വൈകിട്ട് അഞ്ചിന് മാടമ്പില്‍ ശ്രീഭദ്ര ഓഡിറ്റോറിയത്തില്‍ നടക്കും. അഡ്വ. യു. പ്രതിഭാഹരി എം,എല്‍.എ. ഉദ്ഘാടനം നിര്‍വഹിക്കും. ജില്ലാ പഞ്ചായത്ത് വൈസ് പ്രസിഡന്റ് ദെലീമ ജോജോ സമ്മാന വിതരണം നിര്‍വഹിക്കും. മുതുകുളം ബ്ലോക്ക് പഞ്ചായത്ത് പ്രസിഡന്റ് അഡ്വ. ബിപിന്‍ സി. ബാബു ആധ്യക്ഷ്യം വഹിക്കും. ഹരിപ്പാട് നഗരസഭാധ്യക്ഷ പ്രൊഫ. സുധ സുശീലന്‍, കേരള സര്‍വകലാശാല സിന്‍ഡിക്കേറ്റംഗം കെ.എച്ച്. ബാബുജാന്‍ എന്നിവര്‍ മുഖ്യ പ്രഭാഷണം നടത്തും. ജില്ലാ പഞ്ചായത്തും സംസ്ഥാന യുവജനക്ഷേമ ബോര്‍ഡും ചേര്‍ന്നാണ് കേരളോത്സവം സംഘടിപ്പിക്കുന്നത്.