ന്യൂഡല്‍ഹി: നോട്ട് അസാധുവാക്കല്‍ വിഷയത്തില്‍ പാര്‍ലമെന്റില്‍ സംസാരിക്കാതെ ഒഴിഞ്ഞുമാറിയ മോദി മുന്‍ പ്രധാനമന്ത്രിമാരെ വിമര്‍ശിച്ച് രംഗത്ത്. അഴിമതിക്കെതിരെ പ്രാഥമിക നടപടിയെടുക്കുന്നതില്‍ ഇന്ധിരാഗാന്ധിക്കും ഡോ. മന്‍മോഹന്‍സിങിനും വീഴ്ച പറ്റിയെന്നാണ് മോദിയുടെ ആരോപണം. ബി.ജെ.പി പാര്‍ലമെന്റ് അംഗങ്ങളുടെ യോഗത്തിലാണ് മോദിയുടെ പരാമര്‍ശം.

1971 ല്‍ പ്രധാനമന്ത്രി ഇന്ധിരാഗാന്ധിയോട് നോട്ട് അസാധുവാക്കലിന് ശക്തമായ ആവശ്യമുയര്‍ന്നിരുന്നു. എന്നാല്‍ കോണ്‍ഗ്രസിന് ഇനിയും തെരഞ്ഞെടുപ്പുകള്‍ നേരിടണ്ടേയെന്ന ചോദ്യമാണ് ഇന്ധിരാഗാന്ധി ഉന്നയിച്ചതെന്നും മോദി പറഞ്ഞു. അന്ന് നോട്ട് അസാധുവാക്കിയിരുന്നെങ്കില്‍ ഇന്നത്തെ സ്ഥിതിയില്‍ എത്തുമായിരുന്നില്ലെന്നും അദ്ദേഹം പറഞ്ഞു.

മന്‍മോഹന്‍ സിങിന്റെ നേതൃത്വത്തില്‍ വന്ന സര്‍ക്കാരും കള്ളപ്പണത്തിനെതിരെ പത്തുവര്‍ഷം ഒന്നും ചെയ്തില്ലെന്നും മോദി പറഞ്ഞു.

അതേസമയം, ഓരോ എം.പിമാരും നോട്ട് പിന്‍വലിക്കലിന്റെ ഗുണവശങ്ങള്‍ ബോധ്യപ്പെടുത്താന്‍ സ്വന്തം മണ്ഡലത്തില്‍ ഒരാഴ്ച ചെലവഴിക്കണമെന്ന് ബി.ജെ.പി അധ്യക്ഷന്‍ അമിത് ഷാ നിര്‍ദേശിച്ചു. ഉത്തര്‍പ്രദേശിലും പഞ്ചാബിലും അടുത്തവര്‍ഷം തെരഞ്ഞെടുപ്പ് നടക്കാനിരിക്കേ, നോട്ട്‌നിരോധനം ഗ്രാമങ്ങളിലടക്കം വലിയ പ്രശ്‌നമുണ്ടാക്കിയെന്ന റിപ്പോര്‍ട്ടിന്റെ അടിസ്ഥാനത്തിലാണ് ഈ നിര്‍ദേശം.

നോട്ട് അസാധുവാക്കിയ വിഷയത്തില്‍ മോദി പ്രതികരിക്കണമെന്നാവശ്യപ്പെട്ട് പ്രതിപക്ഷ പാര്‍ട്ടികള്‍ നടത്തിയ പ്രതിഷേധത്തെത്തുടര്‍ന്ന് പാര്‍ലമെന്റില്‍ നടന്ന ശീതകാല സമ്മേളനം ഒരുദിനം പോലും ശരിക്ക് നടന്നിട്ടില്ല. എന്നാല്‍ പാര്‍ലമെന്റില്‍ പ്രതികരിക്കാന്‍ മോദി തയ്യാറായതുമില്ല. ഇതിനു പിന്നാലെയാണ് പാര്‍ട്ടി യോഗത്തില്‍ പുതിയ പരാമര്‍ശം നടത്തിയത്.