ശാസ്താംകോട്ട: ജില്ലാസഹകരണ ബാങ്കിന്റെ ബ്രാഞ്ചില്‍ നിന്നും ഇടപാടുകാര്‍ക്ക് നല്‍കാനായി സര്‍വിസ് സഹകരണ ബാങ്കിലേക്കെടുത്ത രണ്ടായിരത്തിന്റെ നോട്ടുകെട്ടില്‍ പൊടിഞ്ഞ നോട്ടും.
കുന്നത്തൂരിലാണ് പൊടിഞ്ഞ നോട്ട് കണ്ടെത്തിയത്. ജില്ലാസഹകരണ ബാങ്കിന്റെ കുന്നത്തൂര്‍ നെടിയവിള ശാഖയില്‍ നിന്നും തുരുത്തിക്കര സര്‍വിസ് സഹകരണ ബാങ്കിലേക്കെടുത്ത 50,000 രൂപയുടെ കെട്ടിലാണ് പൊടിഞ്ഞ നോട്ട് കാണപ്പെട്ടത്. കറന്റ് അക്കൗണ്ടില്‍ നിന്നും ഇടപാടുകാര്‍ക്ക് നല്‍കാനായി കാഷ്യര്‍ സുരേഷ്‌കുമാറാണ് കഴിഞ്ഞ ദിവസം പകല്‍ 12ഓടെ പണം കൈപ്പറ്റിയത്.
രണ്ടായിരത്തിന്റെ ഇരുപത്തിയഞ്ച് എണ്ണം അടങ്ങുന്ന കെട്ടായിരുന്നു ലഭിച്ചത്. തിരികെ ബാങ്കിലെത്തി സുരേഷ്‌കുമാര്‍ പരിശോധിക്കുമ്പോഴാണ് രണ്ടായിരത്തിന്റെ ഒരു നോട്ടില്‍ ഗാന്ധിജിയുടെ ചിത്രമുള്ള ഭാഗം പൂര്‍ണ്ണമായും പൊടിഞ്ഞു പോയത് ശ്രദ്ധയില്‍പ്പെട്ടത്. ഉടന്‍ തന്നെ ജില്ലാ സഹകരണ ബാങ്ക് ബ്രാഞ്ചിലെത്തി കാണിച്ചെങ്കിലും മാറ്റിനല്‍കുവാന്‍ ബാങ്ക് അധികൃതര്‍ തയാറായില്ലെന്ന് പറയപ്പെടുന്നു.