കോഴിക്കോട്: മാധ്യമപ്രവര്‍ത്തകന്‍ എന്‍.പി രാജേന്ദ്രന്‍ രചിച്ച് ഡി.സി ബുക്‌സ് പ്രസിദ്ധീകരിച്ച മലയാള പത്രപംക്തിയുടെ ചരിത്രം പ്രതിപാദിക്കുന്ന 'വിമര്‍ശകര്‍, വിദൂഷകര്‍, വിപ്ലവകാരികള്‍' പുസ്തകം പ്രകാശനം ചെയ്തു. കോഴിക്കോട് പ്രസ്‌ക്ലബ് ഹാളില്‍ നടന്ന പ്രകാശന ചടങ്ങില്‍ മലയാള മനോരമ എഡിറ്റോറിയല്‍ ഡയറക്ടര്‍ തോമസ് ജേക്കബ് മാതൃഭൂമി എഡിറ്റര്‍ എം. കേശവമേനോന് പുസ്തകം കൈമാറി. ദൃശ്യമാധ്യമങ്ങളുടെ അതിപ്രസരത്തെ പത്രങ്ങള്‍ എങ്ങനെ അതിജീവിച്ചുവെന്നതടക്കമുള്ള സാഹചര്യങ്ങളെ രേഖപ്പെടുത്തുന്നതില്‍ നമുക്ക് വിജയിക്കാനായിട്ടില്ലെന്ന് തോമസ് ജേക്കബ് പറഞ്ഞു. കോളമിസ്റ്റുകളുടെ അഭിപ്രായം പത്രത്തിന്റെ നിലപാടായി വ്യാഖാനിക്കപ്പെടുന്ന പുതിയ കാലത്തില്‍ പത്രപംക്തികളുടെ ഭാവി എത്രത്തോളമുണ്ടാകുമെന്ന കാര്യം ആശങ്കയുളവാക്കുന്നതാണെന്നും അദ്ദേഹം പറഞ്ഞു. പ്രസ്‌ക്ലബ് പ്രസിഡന്റ് കമാല്‍വരദൂര്‍ അധ്യക്ഷനായ ചടങ്ങില്‍ മാധ്യമപ്രവര്‍ത്തകനായിരുന്ന ഡോ.കെ ശ്രീകുമാര്‍ പുസ്തകം പരിചയപ്പെടുത്തി. കവി കല്‍പ്പറ്റ നാരായണന്‍, പ്രസ്‌ക്ലബ് സെക്രട്ടറി എന്‍.രാജേഷ്, എന്‍.പി രാജേന്ദ്രന്‍ സംസാരിച്ചു.