കൂത്തുപറമ്പ്: ഐ.എസ്.എല്‍ ഫൈനലില്‍ കേരളാ ബ്ലാസ്റ്റേഴ്‌സിന്റെ പരാജയത്തില്‍ നിരാശയോടെ വട്ടിപ്രം. ബ്ലാസ്റ്റേഴ്‌സ് ടീം ഫൈനലില്‍ പ്രവേശിച്ചതു മുതല്‍ പ്രാര്‍ഥനയിലും അതോടൊപ്പം ആവേശത്തിലുമായിരുന്നു ടീമിന്റെ ആവേശമായ സി.കെ വിനീതിന്റെ നാടായ വട്ടിപ്രം. വിജയപ്രതീക്ഷയുമായി കളി കാണാന്‍ ബിഗ് സ്‌ക്രീന്‍ തന്നെ നാട്ടുകാര്‍ വട്ടിപ്രത്ത് ഒരുക്കിയിരുന്നു. വൈകുന്നേരത്തോടെ നാടിന്റെ നാനാഭാഗത്തു നിന്നു സ്ത്രീ പുരുഷ ഭേദമന്യേ നൂറുകണക്കിനു പേര്‍ വട്ടിപ്രത്തേക്ക് ഒഴുകിയെത്തിയിരുന്നു. ഇതോടെ വട്ടിപ്രം ടൗണ്‍ ഒരു മിനി കൊച്ചിയായി മാറുകയായിരുന്നു.
മത്സരത്തിനു വിസില്‍ മുഴങ്ങിയതോടെ ശിങ്കാരിമേളത്തിന്റെ അകമ്പടിയോടെ ബിഗ് സ്‌കീനിനു മുന്നില്‍ ആരവം തുടങ്ങി. ഒപ്പം മത്സരം കാണാനെത്തിയ മുഴുവന്‍ പേര്‍ക്കും സംഘാടകര്‍ ബിരിയാണിയും വിളമ്പി. ഹാഫ് ടൈം വരെ വിനീതിന്റെ ഭാര്യയും മാതാപിതാക്കളും ബിഗ് സ്‌ക്രീനിന്റെ മുന്നിലിരുന്നാണു മത്സരം കണ്ടത്. പിന്നീട് ഇവര്‍ വീട്ടിലേക്കു മടങ്ങി മത്സരം കണ്ടു.
അവസാന നിമിഷം വരെ ബ്ലാസ്‌റ്റേഴ്‌സ് ജയിക്കുമെന്നായിരുന്നു ഏവരുടെയും പ്രതീക്ഷ. ബ്ലാസ്റ്റേഴ്‌സ് ടീം പരാജയപ്പെട്ടെങ്കിലും വിനീത് ഉള്‍പ്പെട്ട ടീമിന്റെ പൊരുതി മുന്നേറിയതിന്റെ ആവേശത്തിലാണു നാട്ടുകാര്‍. പരാജയപ്പെട്ടെങ്കിലും കേരള ടീം നന്നായി കളിച്ചുവെന്നായിരുന്നു എല്ലാവരുടെയും വിലയിരുത്തല്‍.