ഹരിപ്പാട്: പ്രിന്റിംഗ് സ്ഥാപനത്തിലെ ലേസര്‍ കട്ടിംഗ് മെഷിന്‍ കത്തി നശിച്ചു.
തെക്കേ ഗോപുരനടയില്‍ പ്രവര്‍ത്തിക്കുന്ന സുദര്‍ശന ഗ്രാഫിക്‌സ് എന്ന സ്ഥാപനത്തിന്റെ വിപുലീകരണത്തിനായി കൊണ്ടുവന്ന് സമീപത്തെ ഷെഡ്ഡില്‍ സൂക്ഷിച്ചിരുന്ന പുതിയ ലേസര്‍ കട്ടിംഗ് മെഷിനാണ് കത്തിയത്. മെഷിന് സമീപത്തിരുന്ന ഒരു സ്‌കൂട്ടറും ബൈക്കും, സൈക്കിളും കത്തി നശിച്ചു. മെഷിന് മാത്രം നാലരലക്ഷത്തോളം രൂപ വില വരും. തിങ്കളാഴ്ച രാത്രിയിലായിരുന്ന സംഭവം.
രാവിലെ തൊഴിലാളികള്‍ എത്തിയപ്പോഴാണ് തീപിടുത്തം അറിയുന്നത്. മൊത്തം ആറ് ലക്ഷം രൂപയുടെ നഷ്ടം കണക്കാക്കുന്നു. ഇരുചക്ര വാഹനങ്ങളുടെ ടാങ്കിന് തീപിടിക്കാതിരുന്നതിനാല്‍ വന്‍ ദുരന്തം ഒഴിവായി. വീട് പണിക്കായി സൂക്ഷിച്ചിരുന്ന തടി ഉരുപ്പടികളും കത്തി നശിച്ചിട്ടുണ്ട്. ഹരിപ്പാട് പൊലീസും ഫോറന്‍സിക് വിദഗ്ദരും സ്ഥലത്തെത്തി പരിശോധന നടത്തി.