ന്യൂഡല്‍ഹി: രാജ്യത്തെ തെരഞ്ഞെടുത്ത ഏഴു വിമാനത്താവളങ്ങളില്‍ കൂടി ഇനി മുതല്‍ യാത്രക്കാരുടെ ഹാന്റ് ബാഗുകളില്‍ ടാഗ് പതിക്കില്ല. സി.ഐ.എസ്.എഫ് ആണ് പുതിയ തീരുമാനം കൈകൊണ്ടത്. ഗുവാഹത്തി,പറ്റ്‌ന,ലക്‌നൗ,ജയ്പൂര്‍,തിരുവനന്തപുരം,കൊച്ചി,നാഗ്പൂര്‍ എന്നീ വിമാനത്താവളങ്ങളിലാണ് പദ്ധതി നടപ്പാക്കുന്നത്. ഡിസംബര്‍ 26 മുതല്‍ പദ്ധതി നടപ്പാക്കും.

നേരത്തെ മുംബൈ,ഡല്‍ഹി,ഹൈദരാബാദ്,ബാംഗ്ലൂര്‍,കൊല്‍ക്കത്ത,അഹ്മദാബാദ്,ചെന്നൈ എന്നീ വിമാനത്താവളങ്ങളില്‍ പദ്ധതി നടപ്പാക്കിയിരുന്നു. ഇവിടെ പരീക്ഷണാര്‍ത്ഥത്തില്‍ നടപ്പാക്കിയ പദ്ധതി വിജയിച്ചത് മുന്‍ നിര്‍ത്തിയാണ് പദ്ധതി വ്യാപിപിക്കാന്‍ ഒരുങ്ങുന്നത്. ഇതു മൂലം വിമാനത്താവളങ്ങളിലെ തിരക്കും യാത്രക്കാരുടെ പ്രയാസവും ഒഴിവാക്കാമെന്നാണ് സി.ഐ.എസ്.എഫ് കണക്കുകൂട്ടുന്നത്.

സുരക്ഷാ ഉന്നതോദ്യോഗസ്ഥരുടെ യോഗത്തിന് ശേഷം സി.ഐ.എസ്.എഫ് ഡയറക്ടര്‍ ജനറല്‍ ഒ.പി സിങ് ആണ് പുതിയ തീരുമാനം അറിയിച്ചത്.

എന്നാല്‍, സുരക്ഷാ കാര്യങ്ങളില്‍ യാതൊരു വിട്ടുവീഴ്ചയും ചെയ്യില്ലെന്നും അദ്ദേഹം പറഞ്ഞു. മിക്ക യാത്രക്കാരും ടാഗ് പതിക്കാന്‍ ഇഷ്ടപ്പെടുന്നില്ല. പുതിയ വിമാനത്താവളങ്ങളിലെ സുരക്ഷാ ഉദ്യോഗസ്ഥരുമായി ചര്‍ച്ച നടത്തിയപ്പോള്‍ പദ്ധതി പ്രായോഗികമാണെന്ന മറുപടിയാണ് ലഭിച്ചതെന്നും അടുത്ത ഘട്ടമായി തെരഞ്ഞെടുക്കുന്ന കുറച്ച് വിമാനത്താവളങ്ങളില്‍ കൂടി പദ്ധതി നടപ്പാക്കുമെന്നും സിങ് പറഞ്ഞു.