തിരുവനന്തപുരം: കോണ്‍ഗ്രസിന്റെ ജനകീയ അടിത്തറയില്‍ ചോര്‍ച്ചയുണ്ടായെന്ന് കോണ്‍ഗ്രസ് നേതാവും പ്രവര്‍ത്തക സമിതി അംഗവുമായ എ.കെ. ആന്റണി. പ്രശ്‌നങ്ങളെല്ലാം പരിഹരിക്കാതെ പാര്‍ട്ടിക്ക് തിരിച്ചുവരവ് സാധ്യമല്ല.

പാര്‍ട്ടിയില്‍ ജനറല്‍മാരും ഓഫിസര്‍മാരും കൂടുതലാണ്. കാലാള്‍പ്പടയുടെ കു
റവാണ് ഇപ്പോള്‍ നേരിടുന്നത്. കോണ്‍ഗ്രസില്‍ തലമുറമാറ്റം എളുപ്പമല്ലെന്നും വിട്ടുവീഴ്ചയാണ് നേതാക്കള്‍ക്കുണ്ടാകേണ്ട പ്രധാന ഗുണമെന്നും അദ്ദേഹം പറഞ്ഞു.

അഭിപ്രായ വ്യത്യാസങ്ങള്‍ ഉണ്ടാകുമ്പോഴും യോജിക്കേണ്ട ഇടങ്ങളില്‍ യോജിക്കണം. സംസ്ഥാന കോണ്‍ഗ്രസില്‍ ചെന്നിത്തലയും സുധീരനും ഉമ്മന്‍ ചാണ്ടിയും തന്നെയാണ് പ്രധാന നേതാക്കള്‍. ഇവര്‍ മൂന്നുപേരും ഒരുമിച്ച് നീങ്ങണമെന്നാണ് പാര്‍ട്ടിയുടേയും ഹൈക്കമാന്‍ഡിന്റെയും തീരുമാനമെന്നും അദ്ദേഹം പറഞ്ഞു.

അഗസ്റ്റ വെസ്റ്റ്‌ലാന്റ് ഇടപാടില്‍ അന്വേഷണം വേഗത്തില്‍ പൂര്‍ത്തിയാക്കണം. ഇടപാടില്‍ ചില പ്രശ്‌നങ്ങളുണ്ടായത് കൊണ്ടാണ് യു.പി.എ സര്‍ക്കാര്‍ അന്ന് അന്വേഷണം പ്രഖ്യാപിച്ചത്. അതുകൊണ്ടാണ് ഇറ്റലിയിലെ ഇടപാട് റദ്ദാക്കിയതെന്നും അദ്ദേഹം പറഞ്ഞു.
തിരുവനന്തപുരത്ത് കോണ്‍ഗ്രസ് സംഘടിപ്പിച്ച കെ. കരുണാകരന്‍ അനുസ്മരണ സമ്മേളനത്തില്‍ സംസാരിക്കുകയായിരുന്നു അദ്ദേഹം.