തളിപ്പറമ്പ്: കഴിഞ്ഞ ദിവസം പുലര്‍ച്ചെ ദേശീയപാതയില്‍ ചുടല കപ്പണത്തട്ടില്‍ നിന്നു തളിപ്പറമ്പ് സി.ഐ കസ്റ്റഡിയിലെടുത്ത കാറിലുണ്ടായിരുന്നത് ഡോ. അന്തുക്ക എന്ന പേരില്‍ കുപ്രസിദ്ധനായ അബ്ദുറഹ്മാനാണെന്ന് പൊലിസ് സ്ഥിരീകരിച്ചു. പൊലിസിനെ കണ്ടയുടനെ ഇയാള്‍ ഓടിരക്ഷപ്പെട്ടിരുന്നു. പിന്‍തുടര്‍ന്നെങ്കിലും ഇയാളെ പിടികൂടാനായില്ല. തുടര്‍ന്ന് കാറുടമയെ കേന്ദ്രീകരിച്ച് നടത്തിയ അന്വേഷണത്തിലാണ് കാറിലുണ്ടായിരുന്നത് അബ്ദുറഹ്മാനാണെന്ന് മനസിലായത്. ഇയാളുടെ ഭാര്യയുടെ പേരിലുള്ളതാണ് പിടികൂടിയ കാര്‍. ഡോക്ടറുടെ വേഷത്തില്‍ വിവിധ ആശുപത്രികളിലെ പ്രസവ വാര്‍ഡുകളിലെത്തി പരിശോധന നടത്തുന്നതിനിടയില്‍ ഇയാളെ നിരവധി തവണ പിടികൂടിയിട്ടുണ്ട്. രാത്രികാലങ്ങളില്‍ ഹൈവേയില്‍ നിര്‍ത്തിയിടുന്ന വാഹനങ്ങളില്‍ മോഷണം നടത്തിയതിനും ഇയാളുടെ പേരില്‍ നിരവധി കേസുകളുണ്ട്. സി.ഐയുടെ നേതൃത്വത്തില്‍ വിശദമായ അന്വേഷണം നടന്നു വരികയാണ്.