കൊച്ചി: ഓട്ടോഡ്രൈവറെ മോഷണക്കുറ്റം ആരോപിച്ച് പൊലിസ് ക്രൂരമായി മര്‍ദിച്ചെന്ന് പരാതി. നെട്ടൂര്‍ കുളത്തിപറമ്പില്‍ കെ.കെ നസീറിനെയാണ് പനങ്ങാട് എസ്.ഐയും സംഘവും തല്ലിച്ചതച്ചത്. വെള്ളിയാഴ്ച രാവിലെ എട്ടിന് നെട്ടൂര്‍ ഓട്ടോസ്റ്റാന്‍ഡില്‍ നിന്നു പൊലിസ് കൂട്ടിക്കൊണ്ടണ്ടുപോയ ഇയാളെ വൈകിട്ട് ഏഴുവരെ മര്‍ദിക്കുകയായിരുന്നുവെന്നാണ് ആരോപണം.

നെട്ടൂര്‍ പച്ചക്കറി മാര്‍ക്കറ്റിലെ ഒരു പഴക്കടയില്‍നിന്നു രണ്ടണ്ടാഴ്ച മുന്‍പ് പണം നഷ്ടപ്പെട്ടിരുന്നു. ഈ കുറ്റം ഏറ്റുപറയണമെന്ന് ആവശ്യപ്പെട്ടായിരുന്നു മര്‍ദനം. കൈ പിന്നിലേക്ക് കെട്ടി കമിഴ്ത്തിക്കിടത്തി ലാത്തികൊണ്ടണ്ട് നിരന്തരം അടിച്ചുവെന്ന് നസീര്‍ പറയുന്നു.
ഭാര്യയും മാതാവും പൊലിസ് സ്റ്റേഷനിലെത്തിയതിനെ തുടര്‍ന്നാണ് ഇയാളെ സ്റ്റേഷനില്‍ നിന്ന് വിട്ടയച്ചത്.
നസീറിനെ എറണാകുളം ജനറല്‍ ആശുപത്രിയില്‍ പ്രവേശിപ്പിച്ചിരിക്കുകയാണ്. പൊലിസ് കംപ്ലയിന്റ് അതോറിറ്റി ചെയര്‍മാന്‍ ജസ്റ്റിസ് കെ. നാരായണകുറുപ്പ് ആശുപത്രിയിലെത്തി നസീറിന്റെ മൊഴിയെടുത്തു.