തൃശൂര്‍: ആയിരം, അഞ്ഞൂറ് രൂപാ നോട്ടുകള്‍ അസാധുവാക്കിയ കേന്ദ്രസര്‍ക്കാരിന്റെ നടപടിക്കെതിരേയും പകരം മതിയായ നോട്ടുകള്‍ നല്‍കാതെയുള്ള ജനദ്രോഹ നടപടിക്കെതിരേയും 29 ന് എല്‍ഡിഎഫ് നടത്തുന്ന മനുഷ്യചങ്ങലയ്ക്കുള്ള ഒരുക്കങ്ങള്‍ പൂര്‍ത്തിയായതായി എല്‍ഡിഎഫ് നേതാക്കള്‍ വാര്‍ത്താസമ്മേളനത്തില്‍ അറിയിച്ചു. ജില്ലയുടെ തെക്കേ അതിര്‍ത്തിയായ പൊങ്ങം മുതല്‍ വടക്കേ അതിര്‍ത്തിയായ ചെറുതുരുത്തിവരേ 71 കിലോമീറ്ററാണ് മനുഷ്യചങ്ങല തീര്‍ക്കുക. വൈകീട്ട് അഞ്ചിന് നടക്കുന്ന മനുഷ്യചങ്ങലയില്‍ പൊങ്ങത്ത് വിദ്യാഭ്യാസ മന്ത്രി സി രവീന്ദ്രനാഥും ചെറുതുരുത്തിയില്‍ വ്യവസായ മന്ത്രി എ സി മൊയ്തീനും കണ്ണിയാകും.
രï് ലക്ഷം പേര്‍ ജില്ലയില്‍ ചങ്ങലയില്‍ കൈകോര്‍ക്കും. കലാ, സാംസ്‌കാരിക രംഗങ്ങളിലേയും മതമേലധ്യക്ഷ്യന്‍മാരേയും ചങ്ങലയില്‍ കണ്ണിയാക്കാനുള്ള ശ്രമങ്ങള്‍ നടത്തുന്നതായി സിപിഎം ജില്ലാ സെക്രട്ടറി കെ രാധാകൃഷ്ണന്‍ പറഞ്ഞു. ചങ്ങലക്കൊപ്പം ചെറുതുരുത്തി, തൃശൂര്‍, മുള്ളൂര്‍ക്കര, ഓട്ടുപാറ, അത്താണി, തിരൂര്‍, ഒല്ലൂര്‍, ആമ്പല്ലൂര്‍, കൊടകര, ചാലക്കുടി, കൊരട്ടി കേന്ദ്രങ്ങളില്‍ പൊതുയോഗങ്ങള്‍ സംഘടിപ്പിക്കും. പരിപാടിയുടെ വിജയത്തിനായി പഞ്ചായത്ത്, മുന്‍സിപ്പല്‍ തലങ്ങളില്‍ ജനകീയ കണ്‍വെന്‍ഷനുകള്‍ നടത്തി. ജില്ലയിലെ 128 കേന്ദ്രങ്ങളില്‍ കാല്‍നട പ്രചരണ ജാഥകളും നടത്തി. വാര്‍ത്താസമ്മേളനത്തില്‍ വിവിധ ഘടകകക്ഷി നേതാക്കളും പങ്കെടുത്തു.