കുട്ടനാട്: ഗ്രുപ്പുകള്‍ക്ക് അധീതമായി കോണ്‍ഗ്രസില്‍ ജില്ലാ അധ്യക്ഷന്‍മാര്‍ എത്തിയതോടെ പ്രസിഡന്റുമാരുടെ പിതൃത്വം ഏറ്റെടുക്കാന്‍ ഗ്രൂപ്പുകള്‍ ഒരുങ്ങുന്നു. ആലപ്പുഴ ഡി സി സി അധ്യക്ഷന്‍ അഡ്വ. എം ലിജുവിനെ പ്രസിഡന്റ് പദത്തിലെത്തിച്ചത് രമേശ് ചെന്നിത്തലയാണെന്ന പ്രചരണമാണ് കുട്ടനാട്ടില്‍ ഇപ്പോള്‍ നടക്കുന്നത്.
ഇതിനായുളള പോസ്റ്ററുകള്‍ പ്രത്യക്ഷപ്പെട്ടു തുടങ്ങി. ' അഡ്വ. എം ലിജുവിനെ ഡി സി സി പ്രസിഡന്റാക്കിയ രമേശ് ചെന്നിത്തലയ്ക്ക് അഭിവാദ്യം അര്‍പ്പിച്ച് കെ പി സി സി നിര്‍വാഹക സമിതി അംഗം എം എന്‍ ചന്ദ്രപ്രകാശിന്റെ പേരിലാണ് ഫ്‌ളക്‌സ് ബോര്‍ഡുകള്‍ പ്രത്യക്ഷപ്പെട്ടത്. കോണ്‍ഗ്രസ് ജില്ലാ അധ്യക്ഷമാരെ തെരഞ്ഞെടുത്ത രീതിയില്‍ തനിക്ക് അഭിപ്രായവ്യത്യാസമുണ്ടെന്ന് പ്രതിപക്ഷ നേതാവ് രമേശ് ചെന്നിത്തല നേരത്തെ മാധ്യമ പ്രവര്‍ത്തകര്‍ക്ക് മുന്നില്‍ തുറന്നടിച്ചിരുന്നു.
എന്നാല്‍ പാര്‍ട്ടി അണികള്‍ക്കിടിയില്‍ തെറ്റിദ്ധാരണ പരത്തുംവിധം പ്രത്യക്ഷപ്പെട്ട ഫ്‌ളക്‌സ് ബോര്‍ഡുകളുമായി പ്രവര്‍ത്തകര്‍ക്കോ നേതാക്കള്‍ക്കോ യാതൊരു ബന്ധവുമില്ലെന്ന് പാര്‍ട്ടിയിലെ ചില ഉന്നതര്‍ വ്യക്തമാക്കി. കുട്ടനാട്ടിലെ പ്രാദേശിക കോണ്‍ഗ്രസ് കമ്മിറ്റിയില്‍ നിലവില്‍ കടുത്ത അരക്ഷിതാവസ്ഥ നിലനില്‍ക്കെയാണ് ഫളക്‌സ് ബോര്‍ഡുകള്‍ ഉയരുന്നത്.