കൂത്തുപറമ്പ്: മതിയായ രേഖകളില്ലാതെ കെ.എസ്. ആര്‍.ടി.സി ബസില്‍ കടത്തുകയായിരുന്ന അരക്കോടിയിലേറെ രൂപയുമായി മഹാരാഷ്ട്ര സ്വദേശികളായ രണ്ടുപേര്‍ അറസ്റ്റില്‍. മഹാരാഷ്ട ഗോട്ടിയിലെ ഗനപൂരില്‍ രഞ്ജിത്ത് സാലംഗി (24), സാംഗ്‌ളി ജില്ലയിലെ രാഹുല്‍ അധിക് രാച്ച ഗാട്ടുഗി (22) എന്നിവരാണ് ഇരിട്ടിയില്‍ എക്‌സൈസ് സംഘത്തിന്റെ പിടിയിലായത്. ഞായറാഴ്ച പുലര്‍ച്ചെ 3.30ഓടെ ഇരിട്ടി പഴയ ബസ്റ്റാന്‍ഡിനു സമീപം കൂത്തുപറമ്പ് എക്‌സൈസ് റേഞ്ച് ഇന്‍സ്‌പെക്ടര്‍ വി.വി പ്രഭാകരനും സംഘവും നടത്തിയ പരിശോധനയിലാണ് ഇവര്‍ പിടിയിലായത്.
ശരീരത്തിന്റെ അര ഭാഗത്ത് പ്രത്യേക അറയോടുകൂടിയ ജാക്കറ്റില്‍ ഒളിപ്പിച്ചുവച്ച നിലയിലായിരുന്നു പണം. നൂറിന്റേയും പുതിയ രണ്ടായിരത്തിന്റേയും നോട്ടുകള്‍ ഉള്‍പ്പെടെ 51,86300 രൂപയാണു കണ്ടെടുത്തത്. ഇവയില്‍ ഏറെയും രണ്ടായിരത്തിന്റെ നോട്ടുകളാണ്. സ്‌പെഷല്‍ സ്‌ക്വാഡ് നല്‍കിയ രഹസ്യവിവരത്തിന്റെ അടിസ്ഥാനത്തിലാണു പരിശോധന നടത്തിയത്.