മനാമ: യമനില്‍ സൈനിക സേവനം അനുഷ്ഠിച്ച് ബഹ്‌റൈനില്‍ തിരിച്ചെത്തിയ പ്രത്യേക സൈനിക വിഭാഗത്തിലെ (ടാസ്‌ക് ഫോഴ്‌സ് അംഗങ്ങളെ രാജ്യം ആദരിച്ചു.


യെമനിലെ യുദ്ധഭൂമിയില്‍നിന്ന് ഈയിടെ മടങ്ങിയെത്തിയ സൈനികരെ കാണുന്നതിനും, ആദരിക്കുന്നതിനുമായി ബഹ്‌റൈന്‍ സൈനിക ആസ്ഥാനത്ത് കഴിഞ്ഞ ദിവസം സന്ദര്‍ശനം നടത്തിയ ഖലീഫ രാജകുമാരന്‍ രാജ്യത്തിന്റെ സുരക്ഷയ്ക്കായി ത്യാഗം അനുഭവിക്കുന്ന സൈന്യത്തെ പ്രത്യേകം അഭിനന്ദിക്കുകയും ചെയ്തു.


സൈനിക ആസ്ഥാനത്ത് എത്തിയ രാജകുമാരനെ, റോയല്‍ ഗാര്‍ഡ്‌സ് കമാണ്ടര്‍ ബ്രിഗേഡിയര്‍ ഷെയ്ഖ് നാസര്‍ ബിന്‍ ഹമദ് അല്‍ ഖലീഫ, റോയല്‍ ഗാര്‍ഡ്‌സ് സ്‌പെഷ്യല്‍ ഫോഴ്‌സ് കമാണ്ടര്‍ മേജര്‍ ഷെയ്ഖ് ഖാലിദ് ബിന്‍ ഹമദ് അല്‍ ഖലീഫ എന്നിവരും മറ്റ് ഉന്നത ഉദ്യോഗസ്ഥരും ചേര്‍ന്ന് സ്വീകരിച്ചു.


സൈനികര്‍ക്കുള്ള മെഡലുകള്‍ ഉപപ്രധാനമന്ത്രിയും, സൈനിക വിഭാഗങ്ങളുടെ തലവനുമായ പ്രിന്‍സ് സല്‍മാന്‍ ബിന്‍ ഹമദ് അല്‍ ഖലീഫ സമ്മാനിച്ചു.


യെമനിലെ അരാജകത്വം ഇല്ലാതാക്കി, നിയമവാഴ്ച പുനഃസ്ഥാപിക്കാന്‍ 'ഓപ്പറേഷന്‍ റിന്യൂവല്‍ ഓഫ് ഹോപ്പ്' എന്ന പേരില്‍ സൗദിയുടെ നേതൃത്വത്തില്‍ നടത്തിയ സംയുക്ത സൈനിക നീക്കത്തില്‍ ബഹ്‌റൈന്‍ സൈന്യം നിര്‍ണ്ണായകമായ പങ്കു വഹിച്ചെന്നും, യെമനിലെ മനുഷ്യസ്‌നേഹ പ്രവര്‍ത്തനങ്ങളില്‍ കാര്യമായ ഇടപെടലുകള്‍ നടത്താന്‍ സൈന്യം ശ്രമിച്ചു എന്നും ഖലീഫ രാജകുമാരന്‍ ചൂണ്ടിക്കാട്ടി.

പ്രതിരോധ വകുപ്പ് മന്ത്രി ലെഫ്റ്റനന്റ് ജനറല്‍ യൂസഫ് ബിന്‍ അഹ്മദ് അല്‍ ജലഹ്മ, സ്റ്റാഫ് ചീഫ് ലെഫ്റ്റനന്റ് ജനറല്‍ തെയ്യബ് ബിന്‍ സാഖിര്‍ അല്‍ നൊവൈമി അടക്കമുള്ള ഉന്നത ഉദ്യോഗസ്ഥര്‍ ചടങ്ങില്‍ പങ്കടുത്തു.