ലണ്ടന്‍: ബോക്‌സിങ് ഡേ പോരാട്ടത്തില്‍ ഹള്‍ സിറ്റിയെ മറുപടിയില്ലാത്ത മൂന്നു ഗോളുകള്‍ക്ക് തകര്‍ത്ത് മാഞ്ചസ്റ്റര്‍ സിറ്റി ഇംഗ്ലീഷ് പ്രീമിയര്‍ ലീഗ് പോയിന്റ് പട്ടികയില്‍ രണ്ടാം സ്ഥാനത്തേക്ക് കയറി. എവേ പോരാട്ടത്തിലാണ് സിറ്റി വിജയം സ്വന്തമാക്കിയത്.
ആദ്യ പകുതി ഗോള്‍ രഹിതമായപ്പോള്‍ രണ്ടാം പകുതിയില്‍ യായ ടൂറെ, ഇഹ്‌നാചോ എന്നിവരും അവസാന നിമിഷം ഹള്‍ സിറ്റി താരം ഡേവിസ് വഴങ്ങിയ സെല്‍ഫ് ഗോളുമാണ് മാഞ്ചസ്റ്റര്‍ സിറ്റിയുടെ വിജയം നിര്‍ണയിച്ചത്.
കളിയുടെ 72ാം മിനുട്ടിലാണ് ഹള്‍ സിറ്റിയുടെ പ്രതിരോധ പൂട്ട് തകര്‍ത്ത് ടൂറെ വല ചലിപ്പിച്ചത്. ആറു മിനുട്ടിനുള്ളില്‍ ഇഹ്‌നാചോയുടെ ഗോളും വന്നു. കളി തീരാന്‍ നിമിഷങ്ങള്‍ മാത്രമുള്ളപ്പോഴാണ് സിറ്റിക്ക് ദാനമായി ഹള്‍ സിറ്റിയുടെ വകയുള്ള ഗോളും പിറന്നത്.
ജയത്തോടെ 39 പോയിന്റുകള്‍ നേടിയാണ് മാഞ്ചസ്റ്റര്‍ സിറ്റി രണ്ടാം സ്ഥാനത്തെത്തിയത്. ലിവര്‍പൂള്‍- സ്റ്റോക് സിറ്റി പോരാട്ടത്തില്‍ ലിവര്‍പൂള്‍ വിജയിച്ചാല്‍ സിറ്റി മൂന്നാം സ്ഥാനത്തേക്കിറങ്ങും. സമനിലയോ തോല്‍വിയോയാണ് ലിവര്‍പൂളിനു പിണയുന്നതെങ്കില്‍ സിറ്റിയുടെ സ്ഥാനം സുരക്ഷിതമാകും.