പൊന്നാനി: നഗരത്തിലെ ചില ഓട്ടോകള്‍ പേ.ടി.എം വാലറ്റിലേക്കു മാറുന്നു. രണ്ടാഴ്ച മുന്‍പു ബാര്‍കോഡുള്ള സ്റ്റിക്കര്‍ പതിച്ച് ഓട്ടോകള്‍ മുഖംമിനുക്കിയതിനു പിന്നാലെയാണ് ചില്ലറക്ഷാമത്തെ മറികടക്കാന്‍ ഡിജിറ്റല്‍ സംവിധാനത്തിലേക്കു മാറിയോടുന്നത്.
ഇതിനു പുറമേ ജിയോമണി വഴിയും പണം കൈമാറാനുള്ള സൗകര്യവും പൊന്നാനിയിലെ ഓട്ടോ ഡ്രൈവര്‍മാര്‍ സ്വീകരിച്ചുകഴിഞ്ഞു. മൊബൈല്‍ ഫോണില്‍ പേ.ടി.എം ആപ് ഡൗണ്‍ലോഡ് ചെയ്ത യാത്രക്കാര്‍ക്കാണു സേവനം. പേ.ടി.എമ്മിലേക്കു മാറിയ ഓട്ടോകള്‍ ഐഡിയുടെ ട്രിപ്പിള്‍ ലെയര്‍ സെക്യൂരിറ്റി സ്‌കാന്‍ ചെയ്ത് ഓട്ടോകളില്‍ പതിച്ചിട്ടുണ്ട്. ജിയോമണിയിലും ഇതുതന്നെയാണ് രീതി. ഇതു രണ്ടിനും പുറമേ നഗരത്തിലെ ചില ഓട്ടോ ഡ്രൈവര്‍മാര്‍ മൊബൈല്‍ ബാങ്കിങ് വഴിയും വാടക സ്വീകരിക്കാനുള്ള സൗകര്യത്തിലേക്ക് മാറിക്കഴിഞ്ഞു. ചില്ലറക്ഷാമമാണ് നഗരത്തിലെ ഓട്ടോകള്‍ പുതിയ വഴി തിരഞ്ഞെടുക്കാന്‍ കാരണം.
അഷ്‌റഫ് എന്ന ഡ്രൈവറാണ് ഇതു തുടക്കമിട്ടത്. ഏതാനും ദിവസം മുന്‍പാണ് അഷറഫ് പേ.ടി.എമ്മിലേക്കു മാറിയത്.