പെരിന്തല്‍മണ്ണ: അലിഗഢ് മലപ്പുറം സെന്ററിലെ ഭക്ഷ്യവിഷബാധയെ തുടര്‍ന്ന് ജനപ്രതിനിധികളും ഉദ്യോഗസ്ഥരും കാംപസില്‍ സന്ദര്‍ശനം നടത്തി. മഞ്ഞളാംകുഴി അലി എം.എല്‍.എയും ആശുപത്രിയിലെത്തി. സംഭവത്തില്‍ വിദ്യാര്‍ഥികളും അധ്യാപകരും ഉള്‍പ്പെടെ നൂറ്റിയറുപതോളം പേര്‍ക്ക് ഭക്ഷ്യവിഷബാധയേറ്റിരുന്നു.
ഹോസ്റ്റലിന്റെ ഭക്ഷണശാലയില്‍ ഭക്ഷ്യസുരക്ഷാ ഓഫിസര്‍ സി.എ ജനാര്‍ദനന്റെ നേതൃത്വത്തില്‍ പരിശോധന നടത്തി. പരിശോധനയ്ക്കു ശേഷം നടപടിയെടുക്കുമെന്ന് അധികൃതര്‍ വ്യക്തമാക്കി. ആരോഗ്യ ഉദ്യോഗസ്ഥരായ ഫൗസിയ മുസ്തഫ, ഹെല്‍ത്ത് ഇന്‍സ്‌പെക്ടര്‍മാരായ കെ.കെ നാസര്‍, കെ.പി ജാഫര്‍, ഏലംകുളം പഞ്ചായത്ത് പ്രസിഡന്റ് കെ. ആയിഷ തുടങ്ങിയവരുടെ നേതൃത്വത്തിലുള്ള സംഘമാണ് ഹോസ്റ്റല്‍ സന്ദര്‍ശിച്ചത്. തലേദിവസത്തെ തന്തൂരി, അപ്പക്കാരം, ഉപ്പിന് പകരം ചേര്‍ക്കുന്ന ബ്ലാക്ക് സോള്‍ട്ട് എന്നിവ പരിശോധനയ്ക്കായി ലാബിലേക്കയച്ചു.
ഉത്തരേന്ത്യന്‍ മെസ്സില്‍ അടുക്കള വൃത്തിഹീനമായ ചുറ്റുപാടിലാണ് പ്രവര്‍ത്തിക്കുന്നതെന്നും മാലിന്യ സംസ്‌കരണം വേണ്ടരീതിയില്‍ നടക്കുന്നില്ലെന്നും പരിശോധനാ സംഘം കണ്ടെത്തി. കുടിവെള്ളത്തിനായി വാട്ടര്‍ അതോറിറ്റിയുടെ വെള്ളമാണ് ഉപയോഗിക്കുന്നത്. ഇതു ലഭ്യമല്ലാത്തപ്പോള്‍ പുറത്തുനിന്നു സ്വകാര്യ ഏജന്‍സിയില്‍നിന്നു വെള്ളം എത്തിക്കാറുണ്ട്. ഈ വെള്ളത്തിന്റെ സാംപിളും പരിശോധനയ്ക്കയച്ചു.
അതിനിടെ, ഡി.എം.ഒയുടെ നിര്‍ദേശപ്രകാരം പെരിന്തല്‍മണ്ണ ജില്ലാ ആശുപത്രി സൂപ്രണ്ട് ഡോ. എ. ഷാജി, ഹെല്‍ത്ത് ഇന്‍സ്‌പെക്ടര്‍ എന്നിവര്‍ ആശുപത്രിയലുള്ള വിദ്യാര്‍ഥികളെ സന്ദര്‍ശിച്ച് വിവരങ്ങള്‍ ചോദിച്ചറിഞ്ഞു. ഏലംകുളം പ്രാഥമികാരോഗ്യ കേന്ദ്രം മെഡിക്കല്‍ ഓഫിസര്‍ സംഭവത്തെക്കുറിച്ച് ഡി.എം.ഒക്ക് റിപ്പോര്‍ട്ട് നല്‍കിയിട്ടുണ്ട്. വിഷബാധയേല്‍ക്കാന്‍ കാരണമായി സംശയിക്കുന്ന ഭക്ഷണത്തിന്റെ സാംപിള്‍ ശേഖരിക്കാന്‍ അധികൃതര്‍ക്കു കഴിഞ്ഞിട്ടില്ലെന്നാണ് ജില്ലാ മെഡിക്കല്‍ അധികൃതര്‍ പറയുന്നത്. ഭക്ഷണം തീര്‍ന്നിരുന്നെന്നാണ് വിദ്യാര്‍ഥികളില്‍നിന്ന് ലഭിച്ച വിവരമെന്ന് ആരോഗ്യ വകുപ്പ് അധികൃതര്‍ പറയുന്നു. വിഷബാധയേറ്റവരുടെ കാര്യത്തില്‍ ആശങ്കയില്ലെന്നും മിക്കവരും അടുത്തദിവസത്തോടെ ആശുപത്രി വിടുമെന്നും കാംപസ് ഡയറക്ടര്‍ ഡോ. എ. നുജൂം പറഞ്ഞു.